“Ħabrek biex tiġi għandi malajr, għax Dema, billi ħabb id-dinja preżenti, abbandunani u mar Tessalonika. Kreskes mar fil-Galazja, u Titu fid-Dalmazja. Luqa biss jinsab miegħi. Aqbad lil Mark u ġibu miegħek, għax hu utli għalija fil-ministeru. Lil Tukiku bgħattu Efesu. Meta tkun ġej, ġib miegħek il-kapott li ħallejt warajja fi Troas ma’ Karpu, u l-kotba, speċjalment il-parċmini. Alessandru l-bronżar għamilli xebgħa ħsara; is-Sid għad iroddlu skont l-opri tiegħu. Int ukoll għassislu, għax oppona l-messaġġ tagħna vigorożament” (2 Timotju 4:9-15).
Avolja kien jaf li se tinqatagħlu għall-mewt, Pawlu baqa’ attiv intellettwalment. X’kuntrast ma’ ċerti Kristjani llum! Qajla għandhom ix-xewqa biex jistimulaw imħuħhom ħalli jikbru intellettwalment. Irridu ngħidu wkoll li l-għajta popolari hi kontra l-intellettwaliżmu.
Huwa minnu li t-tagħrif jista’ jneffħek u allura jisfa detrimentali. Ma naħsibx, però, li dan huwa l-periklu tal-ġenerazzjoni moderna. Għall-kuntrarju, xbajt niltaqa’ ma’ Kristjani li huma, fil-vera sens tal-kelma, biblikament injoranti! Naf x’jien ngħid.
Imbagħad, jekk nirrealizzaw kemm nies, matul is-sekli, attribwew il-konverżjoni tagħhom jew il-progress spiritwali tagħhom għal xi ktieb partikolari, allura l-każ hu magħluq. Alla tabilħaqq jogħġbu juża l-letteratura Kristjana biex iressaqhom lejh.
Allura meta wieħed jammetti kemm hu imperattiv naqraw, irridu naqraw ħwejjeġ li jwasslu għall-vitalità spiritwali. Mhux lant taqra kulma jiġi għal idejk. Ktieb tajjeb iġiegħlek taħseb u jħajrek timraħ lil hinn minnu nnifsu. Preferibbilment m’għandux ikun ktieb informattiv biss, imma jispira wkoll. Mhux biss ifarraġ, imma jisfida wkoll, u viċe versa.
Il-Puritani ħallewlna legat ta’ letteratura Kristjana. Meta tkun introdott għaliha, tkun qisek dħalt għal eżaminazzjoni metikoluża, bil-kirurġija, trattament u rikoverta b’kollox. Kultant mhix esperjenza pjaċevoli, imma l-qarrej ċertament jimmiljora ruħu.
Tgħaġġilx fil-qari. Ftakar li l-qari hu strumentali; mhuwiex għan fih innifsu. Il-filosfu Epittetu fehem sewwa d-differenza bejn mezz u għan, u ma kienx impressjonat bl-għadd ta’ kotba li l-istudenti tiegħu kienu jaqraw. Regolarment iddomanda mingħandhom, “Uruni xi progress għamiltu s’issa!”
Nota: Għall-qari Kristjan bil-Malti nirrikmanda ħafna l-kotba ta' Pubblikazzjonijiet Qum (Mob. 79048186). Huma kotba li jgħallmuk u jinkuraġġuk tistudja l-Iskrittura Mqaddsa bir-rispett li jixraqilha.
Nota: Għall-qari Kristjan bil-Malti nirrikmanda ħafna l-kotba ta' Pubblikazzjonijiet Qum (Mob. 79048186). Huma kotba li jgħallmuk u jinkuraġġuk tistudja l-Iskrittura Mqaddsa bir-rispett li jixraqilha.
Talba: “Missier twajjeb, int għallimt il-knisja tiegħek matul is-sekli permezz tal-Ispirtu tiegħek. Illum għandna letteratura rikka ta’ ħsieb u espożizzjoni biblika. Stimulali moħħi biex naqra b’mod silettiv u b’dixxerniment; fil-qari għinni nimmedita, nitlob, nitgħallem u napplika għall-ħajja personali tiegħi. Tħallinix naqra bla ħsieb; ħa jkun kull qari tiegħi għajnuna biex nifhem aħjar il-Kelma Mqaddsa tiegħek, u biha nevalwa wkoll kulma naqra jew nisma’.”
Comments