“Issa kien hemm xi Griegi fost dawk li telgħu sabiex jaduraw fil-Festa. Dawn marru għand Filippu, li kien minn Betsajda fil-Galilija, u rrikjestawh, ‘Sinjur, nixtiequ naraw lil Ġesù.’ Filippu mar u qal lil Indrì, imbagħad Indrì u Filippu marru u qalu ’l Ġesù. Ġesù weġibhom, ‘Waslet is-siegħa illi jkun igglorifikat Bin il-Bniedem. Tassew, tassew ngħidilkom, jekk il-ħabba tal-qamħ li taqa’ fl-art ma tmutx, din tibqa’ waħidha, imma jekk tmut tipproduċi qabda frott’” (Ġwanni 12:20-24).
Il-grandizza mondana taħkem fuq il-moħħ naturali, iżda meta tabilħaqq naraw lil Ġesù, bil-fidi, inkunu rridu nwarrbu minna ġugarelli tat-trabi. Għandna s-Sid smewwieti, infinitament superjuri għall-frugħat baxxi, li jgħaddu. L-essenza tal-evanġelju, l-hena tal-midinbin u l-glorja ta’ kull kredenti tikkonsisti f’did-dehra.
X’inhi l-ħajja mingħajrha? Tlifna kull ġustizzja, qdusija u hena, fina nfusna; imma hawn nilmħuha lkoll, bil-Ġenna u l-glorja magħhom, restawriti għalina fi Kristu. O x’jum hieni meta għall-ewwel darba stmajna bħala prezzjuż lis-Salvatur li resaq lejna u sar il-bidu u t-tmiem tal-fidi tagħna! Kien bidu ġdid ta’ barka eterna. Il-Ġenna nħolqot fina. U allura x’jagħmel dis-sena tajba u mimlija risq jekk mhux Ġesù, li jimxi magħna fit-triq, bħalma mexa rxoxtat terraq ma’ Kleofa u sieħbu lejn Emmaws?
Mingħajr dil-vista tal-fidi ma nistgħux nisserrħu mit-toqol tad-dnub u l-ħtija. Ruħna tibqa’ miżerabbli. Is-soċjetà ma toffrielna ebda feliċità reali. Il-ħsieb tal-mewt jittormenta, u l-ġudizzju finali jimlina bi twerwir u terrur. Iżda kemm huma beati dawk il-midinbin li kapaċi jbierku lil Alla flimkien ma’ Xmun u jgħidu, “Għajnejja raw is-salvazzjoni tiegħek!” (Luqa 2:30).
Talba: “Imxi magħna, Mulej, inkella aħna mitlufin. Żommilna jdejna, inkella nogħtru. Kun dejjem qribna; m’aħniex kapaċi nfendu għal rasna. O li nkunu mbierka b’komunjoni ħelwa miegħek hekk kif inti taqsam Kelmtek magħna, tfissirielna u tapplikahielna għal ħtiġijiet ta’ ruħna. Saħħaħna u wassalna fid-destinazzjoni mixtieqa, għal ġieħ ta’ ismek stess. Ammen.”
Comments