“‘F’mergħa tajba nirgħakom, u l-maqjel tagħhom ikun fuq il-muntanji għoljin ta’ Iżrael; hemm jinxteħtu f’maqjel tajjeb, u f’mergħa bnina jirgħu fuq il-muntanji ta’ Iżrael. Jien stess nirgħa l-merħla tiegħi, u jien stess nagħtihom is-serħan,’ jgħid Sidi l-Mulej. ‘Infittex il-mitlufin, u l-imxerrdin inreġġagħhom lura; il-miġruħin norbtilhom il-ġrieħi, u l-morda mqawwihom, iżda s-smien u l-qawwijin neqridhom; nirgħahom bil-ħaqq” (Eżekjel 34:14-16).
Taħt il-Mulej bħala r-ragħaj, il-qaddisin jingħalfu kemm suppost. It-tagħam tagħhom mhux it-taħwid filosofiku, prodott tal-moħħ uman. Ma jemmnux li l-bniedem hu l-miżura ta’ kollox, iżda jistqarru lil Sidhom bħala l-bidu u t-tmiem ta’ kollox. Jagħrfuh bħala s-sors tal-verità. Ma jiddeterminawx il-verità skont kif jaħsbuha, bħalma jagħmlu r-razzjonalisti. Ma jaslux għall-verità skont kif iħossuha: mhumiex mistiċi. Lanqas jiddeċiedu l-verita mill-esperjenza tagħhom: mhumiex empiriċisti. Finalment, lanqas mhuma msejħa biex ikunu tradizzjonalisti, biex jibilgħu kulma tgħallmu minn tfulithom.
Aktarx, huma nies li jirċievu l-Iskrittura bħala l-verità t’Alla. Il-Mulej jagħlifhom il-verità sostanzjali u solida tar-rivelazzjoni divina tiegħu. Fl-Iskrittura nsibu nutriment ġenwin għar-ruħ, ippreżentat lilna mill-Ispirtu s-Santu. Ġesù nnifsu hu l-ikel għall-fidili, li jsostnihom. Hawnhekk ir-Ragħaj il-Kbir iwiegħed li dan in-nutriment sagru jingħatalna minnu stess. Permezz tal-presbiteri maħtura minnu fuq il-ġemgħat tiegħu, jagħtina l-ikel meħtieġ għar-ruħ.
Meta l-moħħ ikun mimli bil-verità qaddisa, jistrieħ. Dawk li Jaħwe jitma’ jgawdu s-sliem. Ebda kelb ma jinkwetahom, ebda dib ma jiblagħhom, u ebda gwaj ma jiddisturbahom. Jimteddu u jmaxtru l-ikel bnin. Id-dottrini tal-grazzja mhux biss isostnuna, iżda jikkonslawna: fihom għandna l-mezzi biex ninbnew u nistrieħu.
Jalla l-Mulej illum jagħtina li nieklu mill-mergħa tal-Kelma tiegħu, u jistedinna nimteddu fihom. Ħalli dil-ġurnata tkun immarkata bil-meditazzjoni u sliem, minflok bluha, tfexfix u nkwiet.
Talba: “Mulej, għand min immorru? Int għandek il-kliem tal-ħajja eterna. Ebda fonti, ebda għajn oħra ma tissodisfana. Iffriskalna ruħna b’Kelmtek, għax biha taħjina u tirrestawrana, tfarraġna u tinkuraġġina. Agħmel li ma tgħaddix ġurnata mingħajr ma nfittxuha aktar milli nfittxu l-ħobż għal żaqqna. Ammen.”
Comments