Skip to main content

Il-Misterju tal-Fidi Tagħna

“Imma wara li rrifletta fuq dan, anġlu tas-Sid deherlu f’ħolma. ‘Ġużeppi, Bin David,’ qallu, ‘tibżax tieħu ’l Marija bħala martek, għax dak imnissel fiha hu mill-Ispirtu s-Santu. Hi se tiled iben, u int issejjaħ ismu Ġesù, għax hu se jsalva ’ll-poplu tiegħu minn dnubiethom.’ Issa dan kollu ġara sabiex titwettaq il-ħaġa mitkellma mis-Sid permezz tal-profeta, meta qal: ‘Ara, il-verġni titqal u tiled iben jsejħu ismu Emmanwel,’ (li tradott ifisser, ‘Alla magħna’). Xħin Ġużeppi stenbaħ mir-raqda, għamel bħalma ordnalu l-anġlu tas-Sid, u ħadha għandu bħala martu. Iżda ma kellu ebda unjoni konjugali magħha sakemm wildet iben; u sejjaħ ismu Ġesù” (Mattew 1:20-25). 

Kulma Alla l-imbierek għallimna fl-Iskrittura nilqgħuh bħala ikel għal ruħna. Din hi t-tweġiba sempliċi u inkonfutabbli tagħna lill-ispirtu sekulari u lid-disputant ta’ daż-żmien. Ma nistgħux u lanqas aħna msejħin nifhmu kif Alla l-Iben, bl-inkarnazzjoni, għammar u għadu jgħammar f’ġisem uman. Hu persuna waħda, bin-natura sħiħa t’Alla u n-natura sħiħa tal-bniedem. Minn dan aħna assigurati. Għandna l-ikbar prova fl-Iskrittura stess; kelmtu hu l-verità (Ġwanni 17:17). Hi l-ħajja għal ruħna, hi l-ferħ għal qlubna, meta nemmnu lil Alla bla ma nargumentaw miegħu. 

Nafu għala Alla għammar fil-laħam, u x’kienet il-missjoni speċjali mwettqa bit-twelid u ħajtu fostna. Minn dan aħna wkoll żgurati. Nemmnuha mill-istess testimonjanza infallibbli. Ingawdu wkoll ix-xhieda ġewwiena mogħtija mill-Ispirtu tal-verità. L-essenza tal-fidi tagħna hi din: Alla deher fil-ġisem. Niżel fostna biex jgħollina fil-glorja miegħu. Minn issa għandna sehem mill-barkiet tas-salvazzjoni, u nesperjenzaw il-faraġ divin. 

Għaldaqstant diġà għandna l-maħfra; ninsabu ġustifikati – dikjarati ġusti – quddiem l-Imħallef tas-sema u l-art. Il-fidili huma milqugħa fil-persuna ta’ Ġesù, l-irxoxtat u renjanti fis-smewwiet. Bih ruħna hi diġà mqaddsa għal Alla, u ngħatatilna wkoll it-tama żgura u konfidenti ta’ ħajja u glorja eterna. 

Dan kollu rċevejnieh b’wegħda ħielsa, skont il-patt etern tal-grazzja, għall-glorja tat-Trinità Mbierka, u għall-konfort u s-salvazzjoni ta’ midinbin mitlufa. Hekk il-qaddisin huma msejħa f’ġisem wieħed, bi Kristu bħala r-Ras ġdid tagħhom. Għax “hemm ġisem wieħed u Spirtu wieħed – bħalma appuntu kontu msejħin f’tama waħda tas-sejħa tagħkom – Sid wieħed, fidi waħda, magħmudija waħda; Alla wieħed u Missier kulħadd, li hu fuq kulħadd u fost kulħadd u ġo kulħadd” (Efesin 4:4-6). 

Talba: “Mulej Ġesù, x’fonti ta’ barka int! X’garanzija ta’ hena dejjiema fik! Sirt fqir għalina biex insiru sinjuri! Żortna fil-qosor hawn isfel biex tassiguralna post dejjiemi miegħek hemm fuq, biex naraw il-glorja tiegħek, flimkien mal-Missier u l-Ispirtu s-Santu. Ħajr u glorja lilek, Salvatur tal-ġnus, Feddej tiegħi!”

Comments

Popular posts from this blog

Id-Drawwa

“Ġesù rritorna fis-setgħa tal-Ispirtu fil-Galilija, u r-rapport dwaru infirex mal-inħawi kollha. Hu għallem fis-sinagogi tagħhom, imfaħħar minn kulħadd. Mar f’Nażaret, fejn trabba, u skont id-drawwa tiegħu mar fis-sinagoga f’jum is-Sibt. U qam biex jaqra Tnewwillu l-iskroll tal-profeta Isaija. Fetaħ l-iskroll u sab il-post fejn kien hemm miktub: ‘L-Ispirtu tas-Sid fuqi għax unzjonani ħalli nxandar l-evanġelju lill-foqra. Bagħatni nipproklama l-liberazzjoni lill-ikkaptivati, u dawl mill-ġdid lill-għomja, nibgħat illiberati lill-oppressati, nipproklama s-sena favorevoli tas-Sid.’ Imbagħad gerbeb l-iskroll, raddu lill-attendent u ntnasab bilqiegħda. Għajnejn kulħadd fis-sinagoga kienu ssommati fuqu, u beda billi qalilhom, “Illum twettqet din l-Iskrittura li għadkom kemm smajtu’” (Luqa 4:14-21).  Hu sinifikanti ħafna kif hawn jingħad illi Ġesù attenda l-qima fis-sinagoga “skont id-drawwa tiegħu.”  Id-drawwa, imħaddma tajjeb u bil-għaqal, fiha valur imprezzabbli. Issirilna t-tien

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis

Rebbieħa Ma' Kristu

“Madankollu għandi naqra ħwejjeġ kontra tiegħek: għandek hemmhekk nies li jżommu mat-tagħlim ta’ Balgħam, li għallem lil Balak biex jitfa’ ostaklu quddiem ulied Iżrael, ħalli jieklu ikel sagrifikat lill-idoli, u jiffornikaw. Hekk int għandek ukoll lil dawk li bl-istess mod iżommu mat-tagħlim tan-Nikolajtin. Indem mela! Altrimenti se niġi għandek malajr u nikkumbatti kontrihom bix-xabla ta’ fommi. Min għandu widna, ħa jisma’ x’jgħid l-Ispirtu lill-knejjes. Lil min ivinċi nagħtih mill-manna l-moħbija. Nagħtih ukoll ġebla bajda, u fuq il-ġebla isem ġdid miktub li ħadd ma jafu ħlief min jirċeviha” (Rivelazzjoni 2:14-17). Qalb tiegħi, tqanqal biex tippersevera fit-taqbida qaddisa, għax il-premju tar-rebħa hu kbir. Illum nieklu mill-ikel smewwieti li jaqa’ madwar il-kampijiet tagħna, l-ikel li dejjem imantni ’ll-pellegrini fi triqthom lejn il-Kangħan. Iżda hemm merfugħ għalina fi Kristu Ġesù ikel spiritwali wisq ogħla, ikel li għalissa għadu moħbi mill-esperjenza tagħna. Fil-ġarra deh