“Il-Kelma sar laħam u għammar fostna. Aħna osservajna l-glorja tiegħu, glorja tal-Uniġenitu mingħand il-Missier, mimli grazzja u verità. (Ġwanni xehed dwaru, u għajjat, “Dan kien li dwaru għidt, ‘Dak li ġej warajja sebaqni għax kien qabli.’”) Infatti, mill-milja tiegħu aħna lkoll irċevejna grazzja kontra grazzja. Għax il-liġi ngħatat permezz ta’ Mosè; il-grazzja u l-verità ġew permezz ta’ Ġesù Kristu. Qatt ħadd ma ra ’l Alla; Alla l-uniġenitu, li hu f’ħodon il-Missier, dak għarrfu” (Ġwanni 1:14-18).
Il-grazzja hi l-imrieżaq ta’ Kristu, ix-Xemx tal-Ġustizzja. Hi l-liberalità u s-sovranità tal-imħabba. Iva, tieħu s-sopravvent fuq l-imħabba u l-ħniena, għax iżżid magħhom. Tiggarantixxi, mhux sempliċement l-imħabba, imma l-imħabba ta’ wieħed superjuri, sovran daqskemm traxxendenti, Alla li għandu jedd jagħmel kif jogħġbu, li jista’ bla ndħil jagħżel jurix ħniena jew le.
Jista’ jkun hemm l-imħabba bejn l-ugwali, u wieħed inferjuri jista’ jħobb wieħed superjuri; imma mħabba f’wieħed superjuri, u tant superjuri illi jista’ jagħmel kif irid, f’dan l-imħabba tissejjaħ grazzja. Għaldaqstant il-grazzja hi attribwita lis-slaten; jingħad li huma grazzjużi mas-sudditi tagħhom, filwaqt li s-sudditi ma jistgħux ikunu grazzjużi mas-slaten. Issa Alla, li hu s-Sovran infinit, li seta’ għażel jekk iħobbniex jew le, difatti jħobbna, u din hi grazzja.
Mela l-grazzja mhijiex nattiva, iżda donattiva. Bħala xewwiexa kontrih, ebda membru mill-ġens uman m’għandu l-iċken dritt għall-grazzja, altrimenti ma tibqax grazzja. Il-fatt stupend hu dan: xi wħud minna saru reċipjenti tal-grazzja.
Kif u x’fatta? L-ewwel pass għall-grazzja hu illi wieħed jara li jinsab priv mill-grazzja. L-ewwel grad ta’ grazzja hu x-xewqa għaliha. B’argumenti evidenti u validi wieħed jista’ jirrealizza għandux is-sinjali inizjali tal-grazzja, li huma x-xenqa jew xewqa għaliha. Jekk iva, ħa jkun jaf għall-faraġ tiegħu illi l-Ispirtu tal-grazzja qiegħed jitħarrek fuqu u jqanqlu, għax hu Alla li jopera fil-bniedem kull għemil, kif ukoll ir-rieda.
Talba: “Alla etern, kif għoġbok tiffavorina f’Ibnek il-Maħbub! Aħna midinbin li ma konniex infittxuk, u int għarraftna lilek innifsek. Ikkostitwejtna poplu tiegħek, aħna li konna għorba u frustieri għalik. Preparajt għalina belt. Qarribtna lejn Sijon smewwitija. U fuq kollox bl-istess grazzja issa tittrenjana biex nikkomportaw irwieħna bil-qies u fil-pjetà aħna u nistennew il-miġja glorjuża ta’ Ibnek Ġesù, li ġej biex jiġborna fi ħdanu għall-eternità. O grazzja inkomprensibbli! O ħniena ineffabbli! O mħabba bla fini!”
Comments