“Għalhekk qalulu, ‘Sinjur, agħtina dejjem dal-ħobż.’ Imbagħad Ġesù ddikjaralhom, ‘Jien hu l-ħobż tal-ħajja. Min jiġi għandi ma jġuħ qatt, u min jemmen fija mhu se jaqbdu għatx qatt. Iżda bħalma għidtilkom, rajtuni u frattant ma temmnux. Kulma jagħtini l-Missier se jiġi għandi, u kull min jiġi għandi żgurament mhux se nkeċċih ’il barra. Għax jien inżilt mis-sema mhux sabiex nagħmel il-volontà tiegħi, iżda l-volontà ta’ min bagħatni. U din hi l-volontà ta’ min bagħatni, li kulma tani mhu se nitlef xejn minnu, anzi se nqajmu fl-aħħar jum. Għax din hi l-volontà ta’ Missieri, li kull min iħares lejn l-Iben u jemmen fih, ikollu l-ħajja eterna, u jien innifsi se nqajmu fl-aħħar jum’” (Ġwanni 6:33-40).
L-Iben t’Alla umilja lilu nnifsu. Hu li hu tassew Alla, u li mal-Missier u l-Ispirtu s-Santu għammar fil-glorja tal-Ġenna, xejjen lilu nnifsu, niżel mis-sema u kien magħmul fix-xbieha ta’ bniedem. Ma ġiex biex jagħmel skont kif ifettillu, imma deher fostna bħala qaddej biex iwettaq ir-rieda tal-Missier li bagħtu. Ma ġiex biex ikun moqdi imma biex jaqdi, u biex jagħti ħajtu b’fidwa, għall-ħelsien ta’ ħafna. Sar ubbidjenti f’kollox, imqar sal-mewt fuq salib.
X’inhi r-rieda tal-Missier għalih? Il-Missier irid li Ibnu ma jitlifx imqar wieħed jew waħda min uliedu, imma li jqajjimhom fl-aħħar jum. U x’inhi r-rieda t’Alla għalina? Li kull min jara l-Iben u jemmen fih ikollu l-ħajja eterna. Lil Kristu tiltaqa’ miegħu u tarah fil-kelma tal-evanġelju. Emmint fih? Qiegħed tgawdi l-ħajja eterna?
Talba: “Mulej, int għidt illi għandek awtorità minn fuq biex tagħti l-ħajja ta’ dejjem li dawk kollha mogħtija lilek. Jien nirrikorri għandek. Jien nittama fik. Fejn qabel ħabbatt bibien oħra, issa ndur lejk waħdek, għax naf illi jekk se nsalva se ssalvani int. Kapaċi ssalvani, u trid issalvani. Glorja lilek, Feddej setgħani.”
Comments