F’ġieħ is-sewwa, tajjeb għalina llum, li ngħixu fi żmien modern, illi nħarsu lura u naraw x’inkiseb għalina biex ingawduh. U tajjeb nistaqsu aħniex tabilħaqq qed ingawduh, altrimenti jkun għajb jekk ninstabu nagħtu bis-sieq dak li ntrebaħ b’tant u tant sagrifiċċju, anke b’martirju ta’ bosta nies fidili illi ssieltu favur il-verità.
Dawn huma xi wħud mir-rebħiet tar-Riformisti (Luteru, Kalvinu, Zwingli u l-kollegi tagħhom) fis-seklu sittax:
1. Ir-Riforma ġabet libertà sħiħa għall-investigazzjoni xjentifika. Tat bidu għall-istorja moderna; spiċċa d-dlam tal-Medju Evu.
2. Aktar importanti, ir-Riforma kisbet id-dritt sagrosant għal-libertà tal-kuxjenza. L-individwu għaraf li mhuwiex imjassar għal istituzzjoni awtokratika u abbużiva, imma primjarament hu responsabbli lejn Alla, il-Ħallieq u s-Salvatur tal-bnedmin għal dawk kollha li jduru lejh b’indiema sinċiera, permezz ta’ Kristu Ibnu.
3. Ir-Riforma aċċennwat is-saċerdozju tal-fidili kollha. M’għandniex bżonn medjazzjoni saċerdotali umana, ladarba Kristu hu l-Uniku Qassis li patta għad-dnub darba għal dejjem.
4. Ir-Riforma warrbet il-metodu sagramentali għas-salvazzjoni (bil-magħmudija u l-qrar, u l-opri tajba biex jinkiseb mertu), u minflok enfasizzzat ix-xandir pur ta’ l-Evanġelju, illi nsalvaw biss bis-saħħa tas-sagrifiċċju wieħed ta’ Kristu fuq is-salib, billi sempliċement nafdaw fih għall-maħfra sħiħa, skont il-ħniena t’Alla.
5. Ir-Riforma virtwalment reġgħet skopriet u spjegat mill-ġdid l-Evanġelju: aħna magħduda ġusti quddiem Alla permezz tal-fidi biss fi Kristu biss. L-opri tajba huma riżultat ta’ fidi ħajja; b’ebda mod ma jimmeritaw il-Ġenna. Il-Kristjan jgħix ħajja qaddisa u ġusta b’ringrazzjament lil Alla għall-ħniena tiegħu lejh.
6. Ir-Riforma għamlet l-Iskrittura Mqaddsa ktieb miftuħ għall-poplu, tradotta fi lsien in-nies, fejn qabel kienet moħbija wara salt antikalja u imbarazz ta’ tradizzjonijiet li nġema’ matul is-sekli.
7. Ir-Riforma tatna konċett bibliku ta’ x’inhi tabilħaqq il-knisja – il-ġemgħa tan-nies mifdija, li jemmnu u jipprattikaw il-fidi tagħhom bl-imħabba. Hemm differenza bejn organiżmu ħaj (il-Ġisem ta’ Kristu) u organizzazzjoni esterna (Knisja b’ġerarkija taħt il-ħakma ta’ Ruma).
Qiegħed tgawdi minn dawn il-kisbiet? Qiegħed taqra mill-Iskrittura kuljum, u titma’ lil ruħek? Għaraft il-privileġġi li għandek bħala Kristjan, illi sservi lil Sidek bil-libertà kollha? Jew inkella għadek barra mis-saltna tas-smewwiet? F’dak il-każ, iddumx ma ddur. Ixrob mill-ilma tal-ħajja b’xejn.
“Ġesù wieġeb, ‘Kieku kont taf l-għotja t’Alla u min hu dak li qed jgħidlek, ‘Agħtini nixrob,’ int kont tissupplika lilu, u hu kien jagħtik ilma ħaj...Kull min jixrob minn dan l-ilma se jerġa’ jaqbdu l-għatx; imma kull min jixrob mill-ilma li se nagħtih jien, qatt mhu se jaqbdu għatx, anzi l-ilma li se nagħtih se jsir fih funtana ta’ ilma tfawwar għall-ħajja eterna’” (Ġwanni 4:10,13-14).
Comments