“Hekk salvahom minn id dak li kien jobgħodhom, u fdiehom minn id l-għadu. U l-ilmijiet għattew l-għedewwa tagħhom; wieħed minnhom ma baqax. Imbagħad emmnu fi kliemu, u għannewlu għana ta’ tifħir. Insew malajr l-għemejjel tiegħu; ma stennewx iseħħ ħsiebu. Iżda fid-deżert imtlew b’xewqat imħeġġa u ġarrbu lil Alla fid-deżert. U tahom li talbu, iżda bagħtilhom marda ta’ nxufija f’ruħhom” (Salmi 106:10-15).
Meta l-kumdità nnamrat ma’ Luteru, is-suldat ferm ta’ Ġesù Kristu, kellu jgħajjat, “Mulej, ma rridx inkun distratt minn dawn il-ħwejjeġ!” Ħajja faċli, komda u lussurjuża hi ċertament attraenti għall-qalb midinba, li mingħaliha tgħaddi mingħajr Alla. Però meta npaxxu l-ġisem jisfalna ta’ detriment għar-ruħ. Il-ġisem, bla eżerċizzju, jitlef saħħtu u l-funzjoni effettiva tiegħu.
Issa l-afflizzjonijiet huma l-eżerċizzju għar-ruħ. Nitfanstu minnhom, għax huma skumdità għall-ġisem, frattant huma tant meħtieġa għal kull avvanz spiritwali. Ebda wild t’Alla mhu eżentat minnhom. Ladarba l-Missier iħobb lil uliedu, allura jiddixxiplinahom u ma jitlaqhomx għal riħhom. Huma lkoll il-wirt tiegħu skont il-patt.
Fit-talb tagħna sikwit nimitaw lil Ġakbu u Ġwanni meta resqu lejn Ġesù b’petizzjoni partikolari. Is-Sid weġibhom, “Ma tafux x’intom titolbu.” Spiss nitolbu żmerċ; noffru talb żbaljat lil Alla sforz l-injoranza tagħna. Imbagħad nilmentaw illi l-Mulej ma weġibniex skont xewqatna. Ħajr lil Alla! Fehmtu aħjar minn tagħna; hu jħobbna infinitament iżjed milli aħna nħobbu lilna nfusna. Sikwit, kieku jagħtina kulma nitolbuh, l-għotja tiegħu tkun serp flok ħobża, u skorpjun flok bajda.
B’liema paċenzja jimxi magħna l-Mulej! Sikwit nuru kemm aħna wlied tosti, ingrati u immaturi. Frattant ma jarminiex. Kieku Pietru qala’ r-rikjesta tiegħu, Ġesù ma kienx imut, imbagħad kemm Pietru kif ukoll kull ruħ tintilef eternament.
Talba: “Missier, int waħdek għaref; int waħdek taf x’neħtieġu. Għallimna ngħodduha bħala ħniena mingħandek talli ġieli twieġeb talbna b’ċaħda. Nirrealizzaw illi spiss tberikna l-iżjed meta tirrifjuta l-petizzjonijiet tagħna. Int taf l-aħjar, u aħna nistrieħu fik. Ħa jogħġbok tgħallimna nitolbu kif imiss. Ammen.”
Comments