Hemm ħafna x'nitgħallmu mir-Riforma Protestanta. Insemmi erbgħa biss:
1. Ma nistgħux nassumu li l-poplu jaf x’inhu Kristjan u kif issir Kristjan. Irridu nibdew minna nfusna: immorru f’ras il-għajn, il-Bibbja Mqaddsa, u naraw sewwa x’qed jgħidilna l-Mulej. Jekk ma tafx x’fiha l-Bibbja, kif tista’ tagħraf lil Kristu Ġesù u tafda fih għas-salvazzjoni eterna tiegħek?
1. Ma nistgħux nassumu li l-poplu jaf x’inhu Kristjan u kif issir Kristjan. Irridu nibdew minna nfusna: immorru f’ras il-għajn, il-Bibbja Mqaddsa, u naraw sewwa x’qed jgħidilna l-Mulej. Jekk ma tafx x’fiha l-Bibbja, kif tista’ tagħraf lil Kristu Ġesù u tafda fih għas-salvazzjoni eterna tiegħek?
2. Iż-żamma u l-prattika ta’ dottrina skritturali hi aktar importanti minn unità ekkleżjali esterna. Ladarba Ruma baqgħet stinata, u ma riditx tammetti l-fallimenti gravi tagħha, allura l-firda saret inevitabbli.
3. Ma nistgħux naffordjaw li nikkompromettu l-Verità li Alla wriena. Aħjar mibgħuda min-nies u milqugħa minn Alla, milli parti mill-folla miexja fit-triq il-wiesa’ għat-telfien etern.
4. B’riżultat tar-Riforma ħarġu fiċ-ċar ħames prinċipji ewlenin, li xieraq dejjem inżommuhom f’qalbna u f’moħħna:
Sola Scriptura. Nemmnu dak kollu li hemm fil-Bibbja Mqaddsa, u dak biss. It-tradizzjoni hemm postha, imma qatt m’għandha tikkontradixxi jew ixxejjen l-awtorità tal-Iskrittura. Ir-riga li biha nkejlu t-twemmin tagħna hux dritt jew le hi biss l-Iskrittura, li ħarġet minn fomm Alla.
Sola Gratia. Il-bniedem hu salvat purament bil-grazzja u l-ħniena kotrana t’Alla. M’hemm ebda lok għal mertu personali; m’għandi ebda jedd għas-salvazzjoni; hi favur mingħand Alla ħanin.
Sola Fide. Il-bniedem hu ġustifikat (dikjarat ġust darba għal dejjem) quddiem Alla permezz tal-fidi biss fi Kristu biss, mhux bil-fidi u l-opri, jew taħlita ta’ fidi, opri u sagramenti. Insalvaw permezz tal-fidi waħidha, imma l-fidi li ssalva qatt mhi waħidha; tipproduċi opri ta’ mħabba u ubbidjenza grata lejn Alla.
Solus Christus. Kristu wettaq fidwa effettiva għal niesu, b’sagrifiċċju wieħed darba għal dejjem. Hu l-uniku Qassis li għandna bżonn, u huwa wkoll l-uniku Medjatur li bih naslu għand il-Missier. Mhux b’Marija jew bil-qaddisin jew bis-saċerdot, jew bil-purgatorju (li ma jeżistix), iżda biss bis-saħħa tal-Iben omnipotenti t’Alla.
Soli Deo gloria. Il-pjan tas-salvazzjoni ma jħalli ebda lok biex il-bniedem jiftaħar bil-kisbiet tiegħu; aktarx Alla Trinità waħdu jirċievi sebħ u unur. Qaddisin u anġli u saċerdoti m’għandhom ebda mertu fis-salvazzjoni tagħna. Is-salvazzjoni hi opra t’Alla waħdu: il-Missier pjanaha, l-Iben fdiena, u l-Ispirtu s-Santu jagħtina l-ħajja u jqaddisna.
Comments