“Ħalli ebda wieħed minnkom ma jinganna lilu nnifsu. Jekk xi ħadd fostkom jidhirlu li hu għaref f’daż-żmien, ħa jsir ‘iblah’ sabiex isir għaref. Għax l-għerf ta’ did-dinja hu bluha quddiem Alla. Infatti hu miktub: ‘Alla hu dak li jaqbad l-għorrief fl-astuzja tagħhom’; u jerġa’, ‘Is-Sid jaf il-ħsibijiet tal-għorrief, illu huma futili.’ Għalhekk ħalli ebda wieħed ma jiftaħar bil-bnedmin! Għax kollox hu tagħkom, sew jekk Pawlu jew Apollo jew Kefa jew id-dinja jew il-ħajja jew il-mewt jew il-ħwejjeġ preżenti jew il-ħwejjeġ li ġejjin - kollox tagħkom, u intom ta’ Kristu, u Kristu t’Alla” (1 Korintin 3:18-23).
L-appostlu donnu jfittex is-smewwiet u l-art, iż-żmien u l-eternità, biex jiġbor katalgu ta’ ħniniet gawduti minn ulied Alla. Imma sa fejn iwassal il-ħsieb? Biex żgur ma jħalli xejn barra mit-teżorerija tagħna, u biex xejn ma jinstab nieqes għall-konfort tal-maħturin t’Alla, darbtejn jisħaq, “Kollox hu tagħkom”!
Ja fidil, trid tkun taf min int u x’għandek fil-krettu tiegħek? Jew forsi tistaqsi, kif jista’ jkun il-Mulej ikkonsenjali barkiet hekk innumerabbli u għonja? Kif jista’ jkun ingawdi ħniniet hekk infiniti?
Għax fl-aħħar mill-aħħar aħna konxji tad-diżubbidjenza tagħna kontra Alla, sa dis-siegħa stess! U allura din l-imperfezzjoni ma tispussessaniex mit-tgawdija ta’ dawn il-barkiet? Le! Għax l-għotjiet t’Alla huma skont il-grazzja, u ladarba mogħtija ma jittiħdux lura. Hu dikjarat: “Id-doni u s-sejħa t’Alla huma irrevokabbli” (Rumani 11:29). La r-raġuni, la l-liġi u lanqas in-nuqqas ta’ rettitudni ma jistgħu jegħlbu l-favur t’Alla lejn il-maħturin tiegħu.
Immedita sew. Ħares lejn l-Ispirtu tal-verità biex tistabbilixxi l-fidi, issaħħaħ it-tama, tavvanza fl-imħabba u tippromwovi l-hena. “Intom ta’ Kristu” – b’għotja speċjali. Kristu xtrana għalih innifsu biex inkunu tiegħu u hu tagħna. Aħna l-premju tiegħu, talli sofra l-passjoni u l-mewt. Kollox miġbur fih: imħabba għanja, grazzja partikolari, għotja ħielsa, u wegħdi mis-sema li jilħqu sal-art biex jgħolluna sal-ogħla smewwiet, fejn qiegħed Kristu.
X’inhi l-evidenza mbierka illi kollox hu tagħna? Il-fidi tagħna f’Ġesu kif imxandar fl-evanġelju appostoliku. Biex ingawdu dan l-inventarju kotran irid ikollna interess f’Ġesù, u dan l-interess jintwera billi nafdaw fih, u fih waħdu.
Kif tiġina l-fidi? Kif titnissel fina? Billi nisimgħu u nwieġbu għall-Kelma. U l-Kelma ġejja mingħand l-Ispirtu, li wkoll jagħti d-don tal-fidi. U għaliex ingħatalna l-Ispirtu? Għax Ġesù issa hu glorifikat.
Talba: “Missier, seddaqni biex jirnexxili nwarrab kull malizzja, qerq, ipokresija u tqasqis. Bħal dik it-tarbija tat-twelid, xennaqni dejjem għall-ħalib safi ta’ Kelmtek biex nikber bih, għax issa doqt kemm tassew int twajjeb u ħelu. Ma mxejtx miegħi skont ħtijieti, iżda skont il-kobor tal-ħniena tiegħek. Grazzi talli lqajtni fi Kristu; grazzji talli fih jien werriet tiegħek, u kollox hu tiegħi!”
Comments