“Għax il-messaġġ tas-salib hu bluha għal dawk li qed jintilfu, imma għalina li qed isalvaw hu s-setgħa t’Alla. Għax hu miktub: ‘Se neqred l-għerf tal-għorrief; se niffrustra l-intelliġenza tal-intelliġenti.’ Fejn hu l-għaref? Fejn hu l-iskular? Fejn hu d-disputant ta’ daż-żmien? Ewwilla Alla ma bellahx l-għerf tad-dinja? Għax ladarba fl-għerf t’Alla d-dinja ma saritx taf ’l Alla permezz ta’ għerfha, għoġob ’l Alla illi jsalva dawk li jemmnu permezz tal-bluha tal-predikazzjoni” (1 Korintin 1:18-21).
Ħa nemmnuha bla riżerva: Alla jġib fix-xejn l-għerf tal-għorrief, u juri kemm hu bla siwi d-dehen ta’ nies li jidhrilhom huma għaqlin mingħajru. Kliem l-appostlu Pawlu jesprimi theddida għan-nies tad-dinja, u fl-istess ħin hu wegħda għal kull fidil sempliċi.
L-imgħallmin professjonalment il-ħin kollu jipprovaw itertqu l-fidi tal-Kristjan umli, iżda t-tentattivi perversi kollha tagħhom jisfaw meqruda. L-argumenti tagħhom jitkissru frak, it-teoriji tagħhom jittaqbu, il-kumplotti sigrieta tagħhom jinkixfu. L-evanġelju qadim għadu u jibqa’ jeżisti, sakemm jibqa’ ħaj il-Mulej. Kieku seta’ jinqered, ilu li sar irmied.
Ma nistgħux neqirdu l-għerf tal-għorrief aħna, u lanqas nipprovaw nagħmlu hekk. Il-kompitu jinsab f’idejn wisq aħjar. Il-Mulej iserrħilna rasna filli jagħmilha ċara illi hu nnifsu jeqred l-għerf tal-għorrief; u ebda riżoluzzjoni tiegħu mhi fiergħa. Darbtejn jiddikjara l-għan tiegħu, u nistgħu nibqgħu assigurati li mhux se jerġa’ jibdielu.
Nistennew il-waqt. Meta l-Mulej jaqbad il-minġel, jaħsad mill-qiegħ il-filosofija u “l-ħsieb modern.” Dak kollu li jlellex, jekk ma jaqbilx mar-rieda tiegħu, iġibu fix-xejn. Jeqred għalkollox l-għawied, it-tiben u l-ħuxlief. Hu miktub li hekk se jsir, u hekk se jkun. Id-digriet hu inflessibbli u ċert: il-ħażen u kull manifestazzjoni tiegħu għad ikunu tturufnati, mixħuta fil-miżbla.
Alla wiegħed li l-art kollha għad tkun mimlija bit-tagħrif tiegħu, bħalma l-ilma jgħatti l-ibħra. Bħalissa l-oppożizzjoni tgħolli rasha; kull ribelljoni għad tissikket. Kull ilsien għad jistqarr illi Ġesù hu s-Sid suprem. Xi wħud jagħmlu dan għar-rovina tagħhom, oħrajn għall-feliċità eterna tagħhom.
Talba: “Mulej, int twettaq ħidmietek fil-providenza, fil-fidwa u saħansitra fil-ġudizzju. Frattant seddaqna b’Kelmtek biex nibqgħu nħarsu lejk, antiċipattivi u fiduċjużi. Ebda kolp ta’ stat ma jista’ jniżżlek mit-tron tal-univers. Lilek aħna nirrikonoxxu bħala l-Ħallieq u l-Feddej tagħna. Kun twajjeb u ħanin magħna, li nħarsu lejk bit-tama. Ħa tiġi saltnatek fil-milja tagħha, b’Ġesù Kristu Ibnek. Ammen.”
Comments