“Smajtu illi ngħad lill-antiki, ‘Tikkommettix omiċidju,’ u ‘Kull min jikkommetti omiċidju jkun ħaqqu l-ġudizzju.’ Imma jien ngħidilkom, kull min jirrabja ma’ ħuh ikun ħaqqu l-ġudizzju. Jerġa’, kull min jgħid lil ħuh, ‘Raka,’ ikun suġġett għas-Sinedriju; u kull min jgħid, ‘Ja iblah!’ ikun ħaqqu jmur fl-Infern tan-nar” (Mattew 5:21-22).
Ġesù jgħallimna li r-rabja tiddiżonora ’l Alla u tipperikola lil ruħna meta tivventila lilha nfisha f’lingwaġġ ta’ tgħajjir, kliem baxx u irreverenti, jew diskors li jħalli ġrieħi f’qalb min jisimgħu. Meta tisplodi, bħal Vessuvju, aktar se tagħmel ħsara milli ġid. F’dal-każ l-enerġija hi moħlija: hija wżata biex tkisser u ddamdam lil ħaddieħor, flok biex tibnih u ssaħħu.
Ir-rabja tnikket lill-Ispirtu s-Santu meta tibqa’ mistura fi ħsibijietna, u allura tibda tagħlef element ta’ mibegħda lejn il-proxxmu, jew saħansitra lejn Alla! Din l-espressjoni tal-kollera tixbah lill-qanfud, li jimbaram fih innifsu bħala l-unika difiża tiegħu. L-internalizzazzjoni tar-rabja finalment tista’ tkun kaġun ta’ xi waħda tinqara u tinkiteb. Erodija, li “kellha fiha għal Ġwanni,” fl-aħħar mill-aħħar sabitlu tarfu. Min iżomm fil-komma jkun qed itaqqal lilu nnifsu, u ma jistax igawdi l-libertà. Qrusa, mrar, qalb risentita, huma lkoll tbegħrin bl-għatu fuqu. Xi darba se ttir u ttajjar salt nies magħha. Hawnhekk ukoll, l-enerġija hi mberbqa, użata biex żgur titqatta’ minn ġewwa. Issir irritabbli, ittensjonat, miżerabbli fik innifsek, tgħix f’kundizzjoni bla rikonċiljazzjoni. Tidher quddiem in-nies kollok gdiedem.
Flok l-estremitajiet – tisplodi jew tiffriża – hemm espressjoni aċċettabbli tar-rabja. Mhux li tmur minn estrem għall-ieħor. Mhix soluzzjoni jekk bħalissa magħluq fik innifsek u allura tibda tesprimi qalbek kollha, lanqas viċe versa. Ir-rabja dejjem jeħtieġ tkun għomorha qasir, altrimenti tista’ faċilment tiffossilizza fina. F’dak il-perjodu ta’ rabja, ħa nkun ċert illi qed nirrabja minħabba l-ħażen u d-dnub; għal ebda raġuni oħra. Bir-rabja naffronta l-problema morali, mhux lit-tali jew talija.
Talba: “Mulej, jekk jinqalgħu ċirkostanzi mwiegħra illi jirrekjiedu azzjoni drastika mingħandi, aċċerta illi nesprimi rabja mħaddma tajjeb. Ħa tkun dik ir-rabja rilaxxjata taħt kontroll strett, u mmirata biex ittertaq il-problema filwaqt li tedifika lill-proxxmu. Mhux biex nimbarazzahom jew inweġġagħhom, imma dejjem bil-għan li ngħinhom ħalli jiċċaqilqu fid-direzzjoni t-tajba.”
Comments