Il-kelma tal-grazzja u l-verità, bħal tabib għaqli, tippreskrivi speċijiet differenti ta’ riċetti għar-ruħ. Kultant hi xarba qarsa ta’ afflizzjoni, u drabi oħra balzmu ta’ fidi li jsaħħaħ u jikkonforta, bit-taħlita restawrattiva tal-imħabba. Iżda f’kull żmien neħtieġu dixxiplina. Biha niggvernaw u naħkmu ħajjitna, biex hekk ir-ruħ ikollha r-risq u tkun b’saħħitha.
Hu l-obbligu tagħna illi nużaw il-mezzi tal-grazzja, speċjalment it-talb u l-qari meditattiv tal-Iskrittura. Meta nittraskurawhom inkunu qed inwarrbu lil min ippreskriviehom. Insofru telfa u nġarrbu ħsara għar-ruħ. Bħalma l-fidi torbot ir-ruħ ma’ Ġesù bl-irbit ħelu tal-imħabba, hekk tipproduċi konformità miegħu fil-qalb u l-ħajja.
Hekk kif l-Ispirtu jagħni r-ruħ bi grazzji prezzjużi, insibuhom akkumpanjati bl-influwenza tiegħu li tittrasformana. Dejjem jidderiġina għall-Kelma ispirata minnu, biex inkunu mgħallma nevitaw kulma hu kuntrarju għalih. Tħarriġna biex nipprattikaw dawk id-doveri li għandhom tendenza jsaħħu r-ruħ ħalli tippersevera fil-verità u l-qdusija.
Jekk ma noqogħdux attenti ninġarru fit-tgawdija inordinata tal-ġid transitorju. Inkunu qed nagħmlu lilna nfusna indisposti għall-interessi spiritwali. Dan jeħodha kontra l-ħajja tal-fidi, jinterrompi l-komunjoni ħelwa mal-Missier, imewwet il-qalb għax-xirka qaddisa ma’ Ġesù, u jopponi l-konsolazzjoni tal-Ispirtu mbierek. Imbagħad ir-ruħ tibda ssib lilha nfisha bla ħajra jew aptit quddiem it-tron tal-grazzja.
Għaldaqstant ir-ruħ hi msejħa biex tikkonsidra kemm hu qasir iż-żmien! U kemm hi qribna l-eternità! L-Imħallef jinsab mal-bieb. Kulma jeżisti wasal biex jintemm. Se jkun hemm smewwiet ġodda u art ġdida, li fihom tgħammar biss il-ġustizzja.
Talba: “Fid-dawl tat-tama żgura li ħawwilt fina, Mulej twajjeb, għinna biex nikkomportaw ruħna lebsin l-abjad, dejjem lesti għall-wasla tal-Għarus, biex isejħilna għall-bankett tiegħu. Żommna fuq l-allert waqt li nħaddmu t-talent jew talenti fdati f’idejna, biex inroddulek lura daqstant ieħor.”
Comments