“Qalilhom, ‘Dan hu kliemi li għidtilkom meta kont għadni magħkom, illi kien jeħtieġ jitwettaq kulma hu miktub dwari fil-Liġi ta’ Mosè, fil-Profeti u s-Salmi.’ Imbagħad fetħilhom moħħhom biex jifhmu l-Iskritturi. ‘Hekk hu miktub,’ qalilhom, ‘li l-Messija kellu jbati u jerġa’ jqum mill-imwiet fit-tielet jum, u l-indiema għall-maħfra tad-dnubiet tkun pritkata f’ismu lill-ġnus kollha, ibda minn Ġerusalemm. Intom xhieda ta’ dawn il-ħwejjeġ’” (Luqa 24:44-48).
Dan hu l-metodu t’Alla biex isalva l-midinbin b’Ibnu Ġesù. Kull min jaf kemm hu prezzjuż Ġesù, u għandu stima għolja tal-glorja t’Alla, u mħabba sinċiera għal erwieħ immortali, jieħu ħsieb illi fl-evanġeliżmu tiegħu jaċċentwa l-indiema. Bl-indiema nduru lejn il-Mulej, sogħbiena għal ħtijietna, iżda konfidenti illi mingħandu se nsibu ħniena. L-indiema tmur id f’id mal-fidi. Il-fidi hi niedma, u l-indiema hi fiduċjuża.
L-indiema evanġelika tnixxi minn għajn li issa saret tara, widna li issa saret tisma’, u qalb li issa tifhem u tirrispondi għall-Mulej u l-bontà tiegħu. L-indiema fl-inġiba u l-atteġġjament tagħna hi evidenza qawwija ta’ fidi ġenwina. Biha nintebħu bix-xeħta midinba fina, u bl-effetti negattivi tad-dnub.
Minħabba f’hekk Kristu kellu jingħata l-mewt, bħala tpattija għall-ħażen ta’ niesu. Bl-indiema nisimgħu s-saħtiet u l-kundanna tal-liġi kontra l-midinbin, ir-ragħad u minaċċji tagħha fil-kuxjenza. Biha nagħrfu illi xejn ħlief id-demm tal-Ħaruf ma jista’ jpatti għall-ħtijiet. Biha nirrealizzaw illi il-Qaddis t’Alla biss seta’ jwettaq id-domandi ta’ liġi perfetta. Allura hu biss seta’ jkun is-sostitut għall-midinbin. Sofra minflokhom; ħa posthom fuq is-salib, biex huma jinħelsu.
Dan jumilja lir-ruħ, iqaċċat tamiet foloz, u jbaxxihom quddiem il-Mulej.
Talba: “Ġesù tiegħi, ruħi hi konvinta u milquta. Kont taħt is-saħta minħabba li ksirt il-liġi qaddisa tiegħek; kont espost għall-korla divina; kien jixraqli biss il-pwieni tal-Infern. Iżda int wassaltni biex nixgħer u nagħli, bla tama fija nnifsi. Ftaħtli widnejja biex nisimgħek; tajtni l-abbiltà nirrispondi għall-istedina grazzjuża tiegħek, o Tabib ta’ ruħi. U issa li dort lejk għall-isperanza u l-fidwa, kompli kkurani. Żommni sottomess lejk. Id-dnub jeqridni; int issalvani. Il-ħażen itemmni; int tgħajjixni. Jekk mhux int, nintilef.”
Comments