“Huma u ħerġin minn Ġeriko, segwietu folla kbira. Żewġt irġiel għomja bilqiegħda mat-triq, appena semgħu illi Ġesù kien għaddej minn hemm, bdew jgħajtu, ‘Ja Sid, ħenn għalina, Bin David!’ Il-folla ċanfrithom sabiex jisktu, imma huma wisq iktar għajtu, ‘Ja Sid, ħenn għalina, Bin David!’ Ġesù waqaf u sejħilhom. ‘Xi triduni nagħmlilkom?’ staqsa. Weġbuh, ‘Ja Sid, illi għajnejna jkunu miftuħa.’ Ġesù tħassarhom u messilhom għajnejhom; u istantanjament bdew jaraw u segwewh” (Mattew 20:29-34).
Iż-żewġ għomja fil-Vanġelu ma kellhomx ħila jagħtu d-dawl lil għajnejhom stess; kienet operazzjoni impossibbli għalihom. Biss setgħu joqogħdu fit-triq mnejn kellu jgħaddi r-Rabbi Ġesù. Setgħu wkoll jgħollu leħinhom u jappellawlu biex tiġih ħniena minnhom. Irrealizzaw li hu biss seta’ jfejjaqhom. Allura ħadu azzjoni!
Alla tana t-talb, il-qari tal-Iskrittura, ix-xirka ma’ aħwa Kristjani, u mezzi oħra biex bihom nikbru fil-fidi tagħna. Issa dawk li huma ħawtiela fl-użu tal-mezzi huma n-nies li jpoġġu fit-triq mnejn jgħaddi Ġesù. Uża dawn il-mezzi tal-grazzja u għix ogħla minnhom.
Jekk tipprova tgħaddi mingħajrhom, tkun qed tipprova tinnaviga mingħajr kumpass, u allura mingħajr il-gvern ta’ Kristu. Qishom sewwa l-affarijiet: jekk jidhirlek li tista’ tkun ogħla minn ħutek u allura titwarrab minnhom, fl-aħħar tagħti prova li int aktar baxx minn bnedmin infidili.
Aħna kmandati nieħdu ħsieb u nikkoltivaw l-ort tal-Mulej flimkien; aħna ħaddiema flimkien miegħu. Suldat mhuwiex armata; qatt u qatt ma jfettillu jintefa’ fil-battalja waħdu. Membru wieħed lanqas jifforma familja. Jekk taħseb illi kapaċi tgħaddi bħala Kristjan waħdek, meta Alla fil-providenza tiegħu tak opportunità għall-komunjoni ma’ ħutek, tkun qed tistmerr l-għotjiet tiegħu. Terġa’ u tgħid, tista’ tagħraf l-imħabba ta’ Kristu bil-metodu stabbilit minnu stess: tagħrafha “flimkien mal-qaddisin kollha” (Efesin 3:18).
M’hemmx dixxipli li huma aktar bieżla fit-tħaddim tal-mezzi minn dawk li huma l-iżjed ċerti dwar riżultat eċċellenti u konklużjoni tajba, għax b’hekk wieħed jimmotiva u jagħmel kuraġġ lill-ieħor. L-assigurazzjoni tat-tmiem tagħmilna diliġenti fil-mezzi. Għax ir-ruħ tal-kredenti taf illi Alla ddigritahom it-tnejn.
Wettaq id-doveri, mela, bħalma l-mastrudaxxa jinqeda bl-iskwerra, il-martell u s-serrieq, biex jimmanifattura għamara utli. Uża l-mezzi bħalma l-ħamiema ta’ Noè nqdiet bi ġwenħajha, biex iġorruk lejn l-arka tal-Mulej Ġesù, fejn hemm biss issib mistrieħ.
Talba: “Nistennewk, Mulej, biex tgħaddi minn ħdejna, għax int widnejk miftuħa għall-karba ta’ wlied Eva. Nistennewk, iva, għax persważi illi għajnejk huma mimlija kumpassjoni u simpatija lejn il-batuti, speċjalment dawk mgħaffġa taħt il-piż tad-dnub u l-ħtija. Missilna ruħna, Tabib, u nfiqu; qajjimna u aħna nqumu; dawwalna u aħna nimxu fid-dawl, għall-glorja u s-sebħ ta’ ismek stess. Ammen.”
Comments