“Għax il-wegħda ’l Abraħam u lil nislu, li kellu jkun il-werriet tad-dinja, ma saritx permezz tal-liġi, iżda permezz tal-ġustizzja li tiġi bil-fidi. Għax jekk il-werrieta huma l-aderenti tal-liġi, il-fidi tbattlet u l-wegħda hi nnullifikata, għax il-liġi ġġib ir-rabja, imma fejn m’hemmx liġi, lanqas m’hemm trasgressjoni. Minħabba f’hekk hi mill-fidi, sabiex il-wegħda tkun tiddependi fuq il-grazzja, ħalli tkun garantita għan-nisel kollu t’Abraħam - mhux biss għal dawk tal-liġi iżda wkoll għal dawk li huma tal-fidi t’Abraħam, li hu missierna lkoll” (Rumani 4:13-16).
Darba waħda assassina nħbiet fil-kmamar privati tar-Reġina Eliżabetta l-Ewwel tal-Ingilterra, bil-ħsieb li malli tkun waħidha taħbat għaliha u teħdilha ħajjitha. Inqabdet, u minnufih irrealizzat li l-każ tagħha kien bla tama xejn. Għalhekk intefgħet mal-art quddiem ir-reġina u ttalbitilha biex turiha miżerikordja.
“Il-grazzja tiegħek biss tista’ ssalvani,” għajtet imbikkija.
Eliżabetta ħarset lejha bi bruda u qaltilha, “Jekk nurik grazzja, x’wegħda tagħmilli għall-ġejjieni?”
Il-povera ssograt twaħħal ħarsitha f’għajnejn is-sultana, u qaltilha, “Grazzja bil-kondizzjonijiet, grazzja mxekkla bi prekawzjonijiet, mhi grazzja xejn.”
Ir-reġina fehmet l-idea minnufih, u qalet, “Għandek raġun biex tbiegħ; naħfirlek skont il-grazzja tiegħi. Tista’ tmur.”
Il-kronaka rjali tgħarrafna li minn dak il-waqt ir-Reġina Eliżabetta ma kellha ebda servjenta aktar fidila u devota minn din l-istess mara li sa ftit minuti qabel kellha l-intenzjoni ttemmilha ħajjitha ħesrem.
Eżattament il-mod kif il-grazzja t’Alla - ħielsa u bla kondizzjonijiet - topera fl-individwu li jkun mgħaddas fiha: tnaddfu u tibdillu d-direzzjoni u l-kondotta, l-ambizzjonijiet u ħsibijietu, biex isir qaddej leali lejn is-Sid ħanin tiegħu, Ġesù Kristu.
Talba: “Sultan etern, int wisq ogħla u aktar maestuż minn kull monarka mondjali. Int waħdek frixt is-smewwiet, u waħdek ukoll trieġi kollox lejn l-għan aħħari tiegħu. Int urejt il-qawwa ta’ driegħek fis-salvazzjoni tagħna: il-qagħda tagħna quddiemek hi msejsa fuq il-grazzja, grazzja pura. O li napprezzawha tabilħaqq u nitimgħu lil ruħna minnha biex ikollok sudditi li verament iħobbuk, f’ġieħ Ibnek Ġesù, li miegħek jgħix u jsaltan flimkien mal-Ispirtu s-Santu għal dejjem ta’ dejjem. Ammen.”
Comments