“Ix-xagħar abjad kuruna ta’ ġieħ, jekk jinstab fi triq is-sewwa. Ulied l-ulied kuruna tax-xjuħ, u l-glorja tal-ulied missirijiethom. Il-glorja taż-żgħażagħ qiegħda f’saħħithom, u ż-żina tax-xjuħ fix-xagħar abjad tagħhom. Isma’ lil missierek, dak li nisslek, u la żżeblaħx lil ommok meta tixjieħ” (Proverbji 16:31; 17:6; 20:29; 23:22).
X’għerf sublimi hu merfugħ f’dawn il-ftit ħsibijiet! Longfellow, poeta Amerikan, jaqbel, u jkompli jgħid: “L-għajn tax-xjuħija tħarisli mansweta f’qalbi! Il-vuċi tax-xjuħija tidwi bil-krib fiha! Ir-ras xehbiena u l-id ċċongata jraħħmuli irreżistibbilment għas-simpatija! Nivvenera x-xjuħija; u ma nistax ngħid li jogħġobni dak li kapaċi jħares bla emozzjoni fuq għabex il-ħajja, meta l-għabex jibda jiġma’ fuq l-għajnejn impeċpċa, u d-dellijiet tal-krepuskolu jitwessgħu u jitfanndu fuq il-fehma.”
Il-ġust jibqa’ jagħmel is-sewwa anke fi xjuħitu, tarah jippersevera u jirrendi l-frott fi żmienu. John Wesley prietka medja ta’ ħmistax-il prietka fil-ġimgħa. Mhux talli ma waqax biċċiet, iżda ta’ tlieta u sebgħin sena jikteb illi jħossu aktar kapaċi jipprietka milli meta kellu tlieta u għoxrin sena. Ġbinu kien għadu lixx, il-karnaġġjon ismar, u leħnu potenti u ċar, hekk li udjenza ta’ tletin elf ruħ setgħet tisimgħu bla diffikultà, fi żmien meta l-mikrofonu ma kienx jeżisti. Din il-vigorożità jattribwiha għal vjaġġar kontinwu, jibda l-ġurnata kmieni, irqad tajjeb, u tempra mrażżna. “Inħoss u nagħli,” qal, “iżda, bil-grazzja t’Alla, ma ninkwieta b’xejn.”
Frattant illum insibuha diffiċli nqisu x-xjuħija bħala kuruna onorabbli. Aktarx il-kuntrarju, għax ħafna jipprovaw jgħattu x-xemx bl-għarbiel, jagħmlu kull tentattiv biex jaħbu x-xjuħija tagħhom billi jiżbgħu xagħarhom u jintilfu fi proċeduri fjakki bħal dawn. Is-soċjetà moderna tpoġġi ż-żgħożija fuq pedestal u qajla għandha xi kommendazzjoni għax-xjuħija. Ħafna jaħsbu li l-ħajja vera hi dik taż-żagħżugħ, bl-enerġija u l-vitalità, bis-sens qawwi t’avventura, filwaqt li x-xjuħ ikollhom jintefgħu f’rokna jħarsu fil-vojt. X’mistħija, x’għajb għalina nfusna meta nagħtuhom il-ġenb għas-sempliċi raġuni li m’għadhomx daqshekk utli!
Talba: “Missier, m’għandix ħjiel x’hemm riżervat għalija fil-ġejjieni, x’se jkun it-tul ta’ għomri. Hu x’inhu, nagħraf id-dehen providenzjali tiegħek. Int taf jiemi kollha mqar meta ma kien hemm ebda waħda minnhom. Għaldaqstant ħini hu għotja mingħandek; għallimni ninvestih tajjeb. U jekk twassalni sax-xjuħija, ħa nkun wieħed li jkun irrenda frott bl-abbondanza għall-eternità. F’isem Ibnek nitolbok dan. Ammen.”
Comments