“Gwaj għal dawk li jsejħu l-ħażin tajjeb, u t-tajjeb ħażin, li jqiegħdu d-dlam flok id-dawl, u d-dawl flok id-dlam, li jqiegħdu l-morr flok il-ħelu, u l-ħelu flok il-morr. Gwaj għal dawk li huma għorrief f’għajnejhom, u li mingħalihom għaqlin. Gwaj għal dawk li huma rġiel biex jixorbu l-inbid, u rġiel ta’ saħħa biex iħalltu xorb qawwi, li jiġġustifikaw il-ħażin bit-tixħim, u jieħdu d-dritt ta’ min hu ġust!” (Isaija 5:20-23).
Il-problemi f’kull soċjetà u f’kull żmien jirrepetu ruħhom. Sakemm il-bniedem jibqa’ midneb, għandu ħabta jaqleb il-valuri ta’ taħt fuq, minkejja illi fil-kuxjenza tiegħu jaf illi qed jagħmel ħażin. Hu ħati, u jaf.
“Kulħadd sema’ n-nies jitlewmu. Kultant jinstemgħu komiċi u kultant sempliċement spjaċevoli. Insomma, jinstemgħu kif jinstemgħu, naħseb nistgħu nitgħallmu xi ħaġa importanti qatigħ meta nagħtu kas it-tip ta’ ħwejjeġ li jgħidu. Jilmentaw: “Xi tgħid kieku xi ħadd jagħmillek l-istess?” – “Dak posti, jien kont hemm l-ewwel!” – Ħallih; mhu jagħmillek ebda ħsara!” – “Għaliex se tiżżattat int?” – “Agħtini felli larinġa, u jien nagħtik biċċa tuffieħa.” – “U ejja, hekk wegħidtni!” In-nies jitkellmu hekk kuljum, sew l-edukati kif ukoll l-injoranti, sew it-tfal kif ukoll l-adulti.
“Issa li jinteressani dwar dawn ir-rimarki hu illi l-bniedem li jagħmilhom mhuwiex sempliċement qed jgħid illi l-imġiba ta’ sieħbu inzertat li ma togħġbux. Qed jappella għal xi speċi ta’ standard ta’ kondotta illi jippretendi li l-ieħor jaf dwaru. U l-ieħor rarissmu jirrispondi: “Niġi naqa’ u nqum mill-istandard tiegħek.” Kważi dejjem jipprova jġaħġaħha illi mġibtu mhux veru teħodha kontra l-istandard, jew jekk teħodha, hemm xi skuża speċjali...
“Tidher infatti bħallikieku t-tnejn għandhom f’moħħhom xi tip ta’ Liġi jew Regola ta’ politika bil-fer, jew komportament diċenti, jew moralità, jew sejħilha li trid, li dwarha realment jaqblu. U hekk hu. Kieku le, naturalment kapaċi jiġġieldu bħall-bhejjem, iżda ma jkunux qed jitlewmu fis-sens uman tal-kelma. It-tilwim ifisser illi tipprova turi lil bniedem ieħor illi għandu tort. U dan it-tentattiv ma jkun fih ebda sens kieku m’hemmx xi tip ta’ qbil inkwantu x’inhu Tajjeb u Ħażin; l-istess bħal meta ma tagħmilx sens illi futboler ikkommetta fawl kieku m’hemmx xi qbil dwar ir-regoli tal-futbol...
“Aħna sforzati nemmnu f’Tajjeb u Ħażin reali. In-nies jistgħu kultant ikunu żbaljati dwarhom, bħalma kultant l-istudenti jġibu s-somom ħżiena; iżda mhumiex kwestjoni ta’ sempliċi gosti u opinjoni. Il-ħaġa iżjed tixbah it-tabelli tal-multiplikazzjoni: tista’ titgħallimhom bl-iżbalji, iżda huma l-istess għal kulħadd" (C.S. Lewis).
Talba: “O Sid suprem, il-fatt li għandna mħawwel fina s-sens ta’ tajjeb u ħażin jindika illi aħna xogħol idejk. Int tħobb is-sewwa u tobgħod il-ħażen; int tippremja l-ġustizzja u tikkastiga l-inġustizzja. It-tron tiegħek hu stabbilit bi qdusija assoluta. Nitolbuk bi ħrara biex issawwar minna nies sewwa, li nħobbu s-sewwa, għax hekk inkunu qed inħobbu lilek. F’isem Ġesù Kristu nippreżentaw din ir-rikjesta quddiemek. Onoraha, nitolbuk, għall-foħrija tiegħek stess, u għall-ġid etern tagħna. Ammen.”
Comments