“Tassew, int toqtol lill-ħażin, o Alla; għalhekk tbiegħdu minni, ja rġiel tad-dmija. Għax huma jitkellmu kontrik bil-qerq, u l-għedewwa tiegħek jieħdu ismek għalxejn. M’għandix nobgħodhom, o Mulej, lil dawk li jobogħduk? M’għandix nistmellhom lil dawk li jqumu kontra tiegħek? Nobgħodhom bl-akbar mibegħda; ngħoddhom b’għedewwa tiegħi...Il-biża’ tal-Mulej hi l-mibegħda tal-ħażen: il-tkabbir, l-arroganza, l-imġiba ħażina u l-fomm giddieb nobgħodhom” (Salmi 139:19-22; Proverbji 8:13).
Immaġinak miexi fil-kampanja, tiggosta l-fwieħa ħelwa tan-narċis u l-ġiżimin, titgħaxxaq bl-għelieqi maħruta, bis-siġar iħaxwxu fiż-żiffa. Issa fettillek tibda tgħaqqad bukkett fjuri varjat. Iżda int u sejjer, fid-daqqa u l-ħin tibda xxomm rieħa pessma, bilkemm tissaportiha. Quddiemek, bla mistenni, issib miżbla. Jekk ikolli ngħid, naħseb li minflok tkompli tersaq ’l hemm, iddabbar rasek ’il bogħod mill-munzell ta’ żibel jinten.
Għaliex tagħmel hekk? Għax filwaqt li xtaqt il-fjuri, xorta waħda ma ridtx tissogra tlaqqat xi infezzjoni li ma tkunx tiflaħ għaliha. Ħaġa minn ewl il-dinja: il-fwieħa tattirak, iżda fl-istess ħin l-intiena timbottak.
Dan nistgħu ngħiduh ukoll rigward il-biża’ t’Alla. Meta ngħidu, “tibża’ minn Alla,” ma jfissirx sempliċement tħobb it-tajjeb u tfittex tagħmlu, iżda wkoll tistmell l-intiena tal-ħażen. Filwaqt li rridu ninkollaw ruħna mat-tjieba u l-umiltà tal-moħħ, fl-istess ħin irridu naħarbu mill-kburija, l-ardità, il-ksuħija, l-ilsien laxk u kulma Alla ma jistax għalih. Tista’ tkun umli jekk fl-istess ħin għadek titbissem b’approvazzjoni lil kull min qed jistma lil ħaddieħor dubbien? Jew, tkun tħobb il-verità jekk tagħlaq għajnejk għall-gideb u l-qerq ta’ madwarek?
Kristjan ma jingħarfax biss mill-imħabbiet tiegħu. L-identità tiegħu hi żvelata wkoll mill-ħwejjeġ li jistmell. Sikwit ngħidu, “Aħrab mid-dnub bħal meta ssib ruħek quddiem serp.” Forsi ftit minna jafu kif iħossu wieħed meta, għall-ewwel darba, isib lilu nnifsu ftit pulzieri ’l bogħod minn serpent, meta jara l-cobra di capella tgħolli rasha, lesta biex tattakka f’salt, u jaf illi gidma waħda tal-injieb tfisser mewt ċerta. Dak il-ħin jesperjenza emozzjonijiet varjati, impossibbli tiddeskrivihom. Il-biża’, il-mibegħda, l-istmerrija, ix-xewqa biex jallarga minnufih, id-desiderju biex joqtolha, ilkoll jinqanqlu fih f’waqt wieħed, u jqajmulu ġismu xewk xewk.
Issa, ħu żewġt irġiel, wieħed quddiem serpent, u l-ieħor fil-preżenza tas-serpent il-qadim imsejjaħ Satana, ix-Xitan. Wieħed jinsab fil-periklu li jkun migdum, u l-ieħor fil-periklu li jikkommetti dnub. Liema minnhom għandu l-aktar raġun ilebbet ’l hemm?
Talba: “Missier, int urejt miegħi ħniena kbira u tjieba indeskrivibbli. Ġbartni, ikkurajtni, ħsiltni, u introduċejtni fil-familja tiegħek. Issa, o Missieri, meta nagħraf illi kuljum jien imġarrab biex nidneb u noffendik, nitolbok biex tagħtini l-ħila niżgiċċa mid-dnub bħallikieku minn quddiem serp. Ix-xitan hu serp wisq malinn u perikoluż; nitolbok biex bl-awtorità li tani Sidi Ġesù nirfes fuq l-iskorpjuni u ngawdi r-rebħa mogħtija lili.”
Comments