“Wieħed mill-kriminali mdendla hemm insultah, ‘Ewwilla m’intix il-Messija, int? Salva lilek innifsek u lilna!’ Imma l-malefattur l-ieħor ċanfru. ‘Int lanqas tibża’ minn Alla,’ qallu, ‘ladarba tinsab taħt l-istess sentenza ta’ kundanna? Aħna tabilħaqq ġustament, għax qegħdin nirċievu lura x’ħaqqna għal li għamilna, imma dan ebda misfatt m’għamel.’ Imbagħad qal, ‘Ġesù, ftakar fija meta tiġi f’saltnatek!’ Ġesù wieġbu, ‘Tassew ngħidlek, illum se tkun miegħi fil-Ġenna’” (Luqa 23:39-43).
X’għeruq ħoxnin għandha l-inkredulità! X’influwenza perversa ssostni! Kapaċi żżommilna għajnejna u twebbsilna qlubna kontra Ġesù u l-grazzja tiegħu. Iżda fejn id-dnub kotor il-grazzja toktor wisq iżjed. U l-grazzja hi sovrana; Alla jilħaq lil min jogħġbu hu, altrimenti mhijiex grazzja. Hi favur bla mistħoqq.
It-tagħlim ta’ Ġesù hu eżemplifikat fiż-żewġ malefatturi misluba miegħu: wieħed ittieħed u l-ieħor tħalla (Mattew 24:40). Imma l-Mulej ma jwassalx il-midinbin fil-glorja mingħajr indiema. L-indiema, il-fidi fih u l-qdusija fil-qalb huma karatteristiċi ta’ kull persuna mwielda mill-ġdid. Il-Mulej hu ħanin wisq biex iħalli lil niesu jissoktaw fi dnubhom, ikkatenati mal-ħażen bi spirtu ribelluż kontrih.
Ġesù hu eżaltat bħala Prinċep u Salvatur, biex jagħti l-indiema u l-maħfra. Hekk iġib lill-maħturin fi stat ta’ salvazzjoni. Idaħħalhom f’saltna ta’ hena u mħabba, bl-operazzjoni sigrieta u misterjuża tal-Ispirtu tiegħu fi qlubhom. Jaqlagħlhom il-qalb ġeblija u jagħti qalb tal-laħam, biex tagħrfu u tirrispondi għall-istedina tiegħu.
Iż-żewġ kriminali, naqraw, għajruh u insulentawh. Wasal ħin meta wieħed minnhom bidel ħsiebu. Beda jara l-affarijiet differenti. X’wassal biex żviluppat fihom did-differenza? Il-grazzja! Grazzja sovrana li tiddistingwi bniedem minn ieħor. Hi meraviljuża f’għajnejna. Min jispiċċa l-Infern ħaqqu; min jiret il-Ġenna ma jimmeritahiex. Jidħol fiha sforz il-grazzja divina. Mhux għax hu tajjeb hu nnifsu, iżda għax Alla hu twajjeb miegħu f’Ibnu Ġesù.
Kemm hi lventa u setgħana l-grazzja! Xi trasformazzjoni kapaċi taħdem! Filli kriminal, u filli persuna niedma. Filli ribell kburi u arroganti, u filli tallab umli. Filli midneb jiġġustifika lilu nnifsu, u filli jagħti tort lilu nnifsu u jeżalta lil Kristu. Filli ma jridx jaf bis-sewwa, u filli kkonvertit, maħfur, imqaddes, lest għall-Ġenna! Illum ħaqqu l-Infern, u illum stess qiegħed il-Ġenna! Hekk il-ħalliel emmen b’qalbu għall-ġustifikazzjoni tiegħu, u b’fommu stqarr għas-salvazzjoni tiegħu. Ma ħariġx diżappuntat!
Talba: “Missier, m’inix aħjar mill-ħalliel mislub maġenb Ibnek. Spiritwalment jien korrott, maħmuġ u midjun bħalu. Bi dnubi sraqt il-ġieħ, l-unur u l-glorja mingħandek, li huma tiegħek waħdek. Frattant lill-ħalliel daħħaltu fil-Ġenna tiegħek, u abbażi tal-istess sagrifiċċju ddaħħal lili wkoll. Kemm hi meraviljuża mħabbtek lejn dawk li jduru lejk: int mimli ħniena, mogħdrija, u maħfra. Ħalleluja! Ammen.”
Comments