Il-Knisja l-Kapulavur ta' Kristu

“Ma noħolqu ebda kawża ta’ tfixkil f’xejn, sabiex ma jkunx skreditat il-ministeru tagħna. Aktarx, f’kollox nirrikmandaw lilna nfusna bħala servi t’Alla: f’saportu kbir; f’afflizzjonijiet, neċessitajiet u kalamitajiet; fit-tidrib, priġuneriji u f’irvellijiet; f’taħbitiet, f’sahriet bla rqad u ġuħ; bis-safa, tagħrif, paċenzja u beninnità; fl-Ispirtu s-Santu u f’imħabba sinċiera; bil-kelma tal-verità u fis-setgħa t’Alla; bl-armi tal-ġustizzja fl-id il-leminija u x-xellugija; permezz ta’ glorja u diżunur, permezz ta’ infamja u rapport tajjeb. Aħna stmati bħala imposturi, frattant veri; bħala mhux magħrufa, frattant magħrufa sew; bħala qed immutu, frattant nibqgħu ngħixu; bħala msawtin, frattant mhux maqtulin; bħala mnikktin, frattant dejjem nifirħu; bħala foqra, frattant ngħanu lil ħafna; bħala m’għandna xejn, frattant nippossiedu kollox” (2 Korintin 6:3-10).

Min bil-grazzja sar denju quddiem Alla awtomatikament sar indenju quddiem id-dinja. Min hu magħdud bħala ħaġra prezzjuża fil-kuruna ta’ Kristu fl-istess ħin hu kkonsidrat il-knis u ż-żibel tad-dinja. 

Bħala l-mifdija tal-Ħaruf, kemm għandna għalfejn inżommu sħiħ mal-identità tagħna! Jekk id-dinja jfettlilha tpenġina bl-ilwien tagħha, ħa niftakru li r-ritratt tagħna hu diġà delineat. L-istima tal-Mulej hi l-unika waħda li tgħodd, u magħha nintrabtu.

X’insibu allura? In-nies imwielda mill-ġdid huma l-prinċpijiet li jirbħu m’Alla. Huma l-eċċellenti li fihom Kristu jsib l-għaxqa tiegħu. Huma l-glorja tar-Ras tagħhom. Huma l-istrumenti magħżula u maħtura biex bihom jitkompla u jiġi pperfezzjonat l-aħjar u l-ikbar xogħol tiegħu kontra l-agħar u l-isħaħ għedewwa tiegħu f’dawn l-aħħar jiem. Huma l-unzjonati ta’ Kristu, u jħaddmu l-ispirtu ta’ dixxerniment biex hekk għandhom “moħħ Kristu” (1 Korintin 2:16). Ismijiethom huma miktuba fuq ħobbu, bħalma l-ismijiet tat-tribujiet ta’ Iżrael kienu minquxa fuq il-korazza ta’ Arun. Huma siġill fuq qalb il-Feddej tagħhom, imnaqqxin fuq il-pali t’idejh.

Dawn jifformaw il-knisja tiegħu, membri ħajjin imlaqqma fih. Mhix kwistjoni jissejħux Kattoliċi jew Protestanti, jew bi kwalunkwe isem ieħor; l-importanti hu illi jgħixu bih u għalih. Flimkien, b'Ġesù nnifsu bħala r-Ras uniku tagħhom, jifformaw il-ġisem tiegħu, l-għarusa tiegħu, il-kapulavur tal-grazzja tiegħu. 

Talba: “O Alla tagħna, int tħobb il-knisja b’imħabba unika, speċjali, infallibbli u dejjiema. Il-glorja kollha li tfittex għall-eternità tirriżulta mill-ħidma tiegħek biex tibni lil Sijon. Aħna nfaħħruk għal dal-kapulavur manjifiċenti, għax nafu li għad ikun l-uniku monument tal-glorja tiegħu għal dejjem ta’ dejjem. Ammen.”