“Il-ġlied jiġi biss mill-kburija, iżda l-għerf qiegħed ma’ dawk li jieħdu parir. Il-Mulej iġarraf dar il-kburin, iżda jżomm weqfin is-slajjen tal-armla. Kull min hu mkabbar f’qalbu l-Mulej jistkerrhu; jagħmel x’jagħmel, ma jeħlishiex. Għajnejn imkabbra u qalb minfuħa, dawl il-ħżiena, huma dnub. Ħa jfaħħrek ħaddieħor, iżda mhux fommok; wieħed barrani, iżda mhux xofftejk. Il-kburija ta’ bniedem iċċekknu, iżda min hu umli fl-ispirtu jkollu l-ġieħ” (Proverbji 13:10; 15:25; 16:5; 21:4; 27:2; 29:23).
Ħa jservu dawn il-qwiel ispirati bħala eżami tal-kuxjenza għal kull wieħed minna. Ftit huma l-Kristjani li jammettu element ta’ kburija fihom. Għalkemm ma noqogħdux niftaħru ma’ kulħadd, nippretendu li aħna umli. Il-pagun, meta jħares lejn imqar waħda mir-rix splendidu tiegħu, jisfa fjammat bil-kburija, imma ħarsa waħda lejn is-saqajn koroh tiegħu mal-ewwel iġġibu f’postu. Hekk ukoll magħna l-bnedmin. Jekk hemm il-ġmiel, l-għana, il-fama, is-suċċess jew kwalunkwe fattur ieħor li jħajjarna biex nadottaw dispożizzjoni mkabbra, nintebħu faċilment b’xi kontraparti oħra li tbaxxina fit-trab.
Il-kburija toqtol il-gratitudni, iżda moħħ umli hu l-ħamrija li minnu jisponta r-radd il-ħajr. Persuna mkabbra rari hi rikonxxenti, għax qatt ma jidhrilha li otteniet daqskemm jistħoqqilha. Meta tirċievi kwalunkwe barka, tgħid, “Iva, imma jmissha kienet ikbar!”
Il-kburija ġġennek, jekk mhux litteralment, ċertament moralment. Is-suċċessi rapidi u fenomenali ta’ Alessandru l-Kbir tant neffħulu kburitu, illi sar jiddisprezza lil missieru, dera jxidd ilbies Persjan kollu rrakkmat b’sinjurija esaġerata, u finalment iddikjara lilu nnifsu bin Ġove.
Issa li qrajt dir-riflessjoni, staqsi lilek innifsek: “Jien bniedem kburi jew umli?” Hi konsiderazzjoni kruċjali għas-saħħa spiritwali tagħna. L-umli jingħaraf, l-ewwel u qabel kollox, għax ma jipprovax isalva lilu nnifsu, iżda jafda fi Kristu Ġesù għall-maħfra u l-ħajja eterna fis-sema.
Talba: “Mulej, ħalli dil-kelma tiegħek turi tassew il-kondizzjoni ta’ qalbi. Minħabba l-kburija l-isbaħ anġlu tiegħek sab ir-rovina tiegħu. U dik l-istess trappola ta’ kburija għadha mifruxa quddiemna. Aqlagħna minnha; illiberana mill-jasar lejna nfusna. Agħti lilna lkoll qalb ta’ qaddej biex inservuk bla ma nikkonsidraw lilna nfusna. F’ġieħ Kristu Ibnek nitolbuh dan, u f’ismu. Ammen.”
Comments