“Tagħrfu li jien hu l-Mulej, meta nġibkom f’art Iżrael, fil-pajjiż li b’id merfugħa ħlift li nagħtih lil missirijietkom. Hemm tiftakru f'imġibitkom, u fl-għemejjel tagħkom kollha li bihom tniġġistu, u titkexkxu minnkom infuskom minħabba l-ħżunijiet tagħkom kollha li għamiltu. U tagħrfu mbagħad li jien hu l-Mulej, meta nagħmel magħkom minħabba f’ismi, mhux skont triqatkom il-ħżiena jew skont l-għemejjel imħassra tagħkom, o dar Iżrael,’ jgħid Sidi l-Mulej” (Eżekjel 20:42-44).
Meta l-Mulej jilqagħna fi ħdanu, u jpoġġina f’qagħda ta’ favur, paċi u sigurezza miegħu, iwassalna biex nindmu mill-fallimenti kollha tagħna ħalli niddedikaw ruħna f’ubbidjenza lejh, sforz il-grazzja effettiva tiegħu fina. L-indiema hi bidla fil-ħsieb, li tirriżulta dejjem f’kambjamenti konkreti fil-kondotta. Moralment ngħaddu ’l quddiem.
L-indiema tant hi prezzjuża illi nistgħu nsejħulha djamant tal-aqwa kwalità. Il-Mulej iwiegħed l-indiema lil niesu bħala wieħed mir-riżultati santifikanti tas-salvazzjoni. Alla jagħti d-don tal-indiema, u jirċievi mixja niedma mingħandna. Pietru ddefenda l-aġir tiegħu quddiem l-aħwa Lhud meta mar jipprietka għand il-pagani, u “malli semgħu dan ikkwitaw, igglorifikaw ’l Alla, u qalu, ‘Mela Alla ta mqar lill-Ġentili l-indiema għall-ħajja’” (Atti 11:18).
M’aħniex kapaċi nindmu waħidna: Alla l-imbierek irid jopera fi qlubna biex ireġġagħna lura għandu. L-indiema ma jagħtihilniex bħala pillola morra, iżda bħala għasel, għax il-frott tagħha jferraħna. Nitgħallmu nikkuntentaw b’Alla, nitgħaxxqu fih, u nservu lilu.
Il-Mulej jagħtina t-tagħrif tal-maħfra, mixtrija bid-demm tas-salib. Jurina kif kellu ħniena minna bla ma ħaqqna. Dan ikun l-aħjar mezz biex idewweb qlub tal-ħaġar. Inħossuna mwebbsa u kalluża kontra Alla? Ejjew nimmeditaw dwar imħabbtu li wriena billi daħal f’patt magħna. Imbagħad narmu d-dnub, nitkexkxu mill-offiżi tagħna stess. Nistmelluhom; iva, saħansitra nibdew nobogħdu lilna nfusna talli ħadnieha kontra l-imħabba infinita tas-smewwiet.
Talba: “Missier mill-aktar benevolenti, nersqu lejk imbottati mill-wegħda tiegħek stess, għax int mimli bil-maħfra għal dawk li jibżgħu minnek. Nitolbuk tgħinna niftakru, nindmu, jiddispjaċina ġenwinament minn ħżunitna, u nduru lejk. O li kieku kellna ngawdu t-tidwib ta’ għali qaddis! X’solliev ikun għargħar ta’ dmugħ għalina, meta tabilħaqq jisgħobbina għal dnubietna! Mulej, idrob il-blata, kellimha, u ħalli l-ilma jnixxi minnha! Ammen.”
Comments