“Imbagħad rajt tron kbir abjad u dak bilqiegħda fuqu. L-art u s-sema ħarbu mill-preżenza tiegħu, u post ma nstabx għalihom. U rajt il-mejtin, il-kbar u ż-żgħar, weqfin quddiem it-tron, u nfetħu l-kotba. Infetaħ ktieb ieħor, li hu ktieb il-ħajja. Il-mejtin kienu ġġudikati mill-ħwejjeġ rekordjati fil-kotba, skont l-għemejjel tagħhom. Il-baħar radd l-mejtin li kienu fih, u l-mewt u Ħades raddew il-mejtin fihom, u kienu ġġudikati, kull wieħed skont l-għemejjel tagħhom. Imbagħad il-mewt u Ħades kienu mitfugħin fl-għadira tan-nar. Din hi t-tieni mewt, l-għadira tan-nar. Jekk isem xi ħadd ma nstabx miktub fi ktieb il-ħajja, kien mitfugħ fl-għadira tan-nar” (Rivelazzjoni 20:11-15).
Ġie li smajt l-ilment illi jekk imqar se jkun hemm ruħ waħda fl-Infern dan il-fatt itellef il-feliċità ta’ dawk salvati. It-tali protesti jinstemgħu ħanina, però fil-fatt min ileħħinhom qajla jaf x’inhu jgħid. Jissuġġerixxu illi n-nies bla mħabba, diżubbidjenti u miskredenti, nies li impriġunaw lilhom infushom u rroftaw ix-xhieda u l-imħabba t’Alla, għandhom jitħallew jibblekmejljaw l-univers sħiħ.
Ma nistgħux niddefendu l-pożizzjoni assurda illi qabel ma l-mitlufa jikkunsentaw illi jkunu feliċi (bil-kondizzjonijiet u t-termini tagħhom stess) ħadd m’għandu jedd igawdi l-ferħ. Inkunu prattikament qed jgħidu li l-qawwa finali u r-rebħa għandha tkun tal-għedewwa t’Alla. Finalment inkunu qed ninsinwaw illi l-Infern għandu jkun kapaċi jagħmel veto fuq il-Ġenna.
Żewġ alternattivi hemm. Għad jasal jum meta l-hena tipprevali u kull min produċa d-deni, il-ħsara u l-ħażen ma jkunx kapaċi iżjed jinfetta d-dinja bihom. Jew inkella għal dejjem ta’ dejjem il-ħżiena jkunu kapaċi jiddestruġġu fit-twajba kull feliċità li huma jirroftaw għalihom infushom.
Hi skuża pessma tgħid illi m’inix se taċċetta s-salvazzjoni maħduma fuq il-Kalvarju għax xi nies ħa jitħallew barra fid-dlam. Dan sofiżmu bla sinsla, argument redikolu. Ħadd f’sensih ma jasal biex jaħtar kelb f’maxtura bħala t-tirann tal-univers.
Talba: “O Alla omnipotenti, il-pjan etern tiegħek hu invinċibbli u infallibbli. Nithennew fik, u fl-intenzjoni tajba tar-rieda tiegħek insibu l-feliċità dejjiema tagħna. Aħna neżistu għalik, mhux int għalina. Daħħalna f’armonija mal-ħsieb tiegħek: ħa jkun dak li trid int, kif fis-sema hekk ukoll fl-art.”
Comments