“Hu ma jilmaħx ħażen f’Ġakobb u lanqas ra għawl f’Iżrael. Il-Mulej, Alla tiegħu, miegħu, u l-għajta ta’ sultan hi fosthom. Alla ħariġhom mill-Eġittu; hu għalihom bħal qrun ta’ gendus salvaġġ. Tassew, m’hemmx seħer f’Ġakobb, lanqas hemm xi teħbir f’Iżrael. F’waqtu jingħad lil Ġakobb u lil Iżrael: ‘X’għamel Alla!’ Ara, il-poplu jqum bħal ljunissa u jintrefa’ bħal iljun; ma jimteddx qabel ma jkun kiel il-priża tiegħu, u jkun xorob demm il-maqtulin” (Numri 23:21-24).
Dal-kliem hu bħal mannara li tqaċċat mill-għeruq kull biża’ belha minħabba s-superstizzjoni. Anke jekk is-seħer u l-okkult huma minnhom, ma jistgħux jaffettwaw in-nies t’Alla. Dawk li Alla jberikhom, id-demonji flimkien ma jistgħux jisħtuhom. L-avversarji tagħna jistgħu jikkomplottaw kif iridu; mhux se jirnexxilhom ixejnu lill-erwieħ miksuba minn Kristu għal Alla. Ix-xtabi ta’ Ħades qatt mhu se jipprevalu kontra l-imsejħin u l-maħbubin tiegħu, magħrufin minnu mill-eternità.
Nies bla kuxjenza, bħal Balgħam, jistgħu jikkonfoffaw biex iwaqqgħu l-poplu t’Alla, u jġarrfuh. Iżda bis-segretezzi u makkinarji kollha tagħhom huma ddestinati għal telfa ċerta. Il-porvli tagħhom imxarrab, xifer ix-xabla tagħhom mgħattan. Jinġemgħu flimkien, iżda l-Mulej hu avversarju kontrihom, u l-kunsill tagħhom jisfaxxa. Kull arma mgħollija kontra niesu tiddewweb fix-xejn.
Allura daparti tagħna nistgħu noqogħdu bi kwietna, u nħalluhom jinsġu x-xbieki tagħhom; qatt ma jirnexxilhom jaqbduna. Avolja jsejħu ’l Bagħalżebul bħala l-għajnuna speċjali tagħhom, u jħaddmu s-snajja’ kollha tagħhom kontrina, kollox isirilhom suf. Is-seħer tagħhom ċertament ifalli; it-teħbir tagħhom jaqa’ mal-art.
X’barka din! Kemm għandha tikkalma u tikkwieta lil qlubna! Ġakobb jissara m’Alla, iżda ħadd ma jista’ jissara miegħu u jegħlbu. Iżrael għandu qawwa m’Alla u jegħleb, iżda ħadd m’għandu qawwa jegħleb lilu. Lanqas mix-xitan m’għandna għalfejn nibżgħu. L-Ispirtu s-Santu li jgħammar fina hu infinitament aqwa u isħaħ minn kull forza demonika. “Ikbar hu dak li hemm fikom minn dak li hu fid-dinja” (1 Ġwanni 4:4).
L-avversarji tagħna ma jistgħu jagħmlulna ebda ħsara dejjiema, għax aħna nafdaw f’Alla l-ħaj. U b’Alla bħala l-kenn tagħna, nisfidaw ix-xitan u l-leġjuni kollha tiegħu. Għax tabilħaqq, “Alla tagħna hu fortizza soda, sur sħiħ li qatt ma jċedi!”
Talba: “Int twiegħed, Missier, illi jekk naħtru lilek bħala l-kenn tagħna, u nagħmlu lill-Ogħla bħala l-għamara tagħna, ma jiġrilna ebda deni, lanqas ebda ħsara ma tersaq lejn darna. Għax int tqabbad lill-anġli tiegħek biex jindokrawna, ħalli jħarsuna fi triqatna. Agħmel, Mulej, illi nduqu kuljum mill-benna ta’ din kelmtek favur tagħna. Ammen.”
Comments