“Issupplikaw u jingħatalkom; fittxu u ssibu; ħabbtu u jinfetħilkom. Għax kull min jissupplika jirċievi, min ifittex isib u ’l min iħabbat jinfetaħlu. Liema bniedem hemm fostkom, jekk ibnu jissupplikah ħobża, inewwillu ħaġra? Jew jekk jissupplikah ħuta, jaqaw inewwillu serpent? Jekk mela intom, avolja intom ħżiena, tafu kif tagħtu rigali tajbin lit-tfal tagħkom, kemm iżjed Missierkom fis-smewwiet jagħti ħwejjeġ tajba ’l dawk li jissupplikawh!” (Mattew 7:7-11).
L-aqwa metodu għal kull persuna konvertita hu dan: titħassibx iżda itlob. Keċċi l-ansjetà billi tikkoltiva komunjoni intima u ta’ kwalità ma’ Missierek smewwieti. Ġorr kuljum bżonnijietek u saħansitra xewqatek quddiem is-Sid sovran, l-għassies ta’ ruħek, li miegħu tinsab marbut b’patt ta’ grazzja. Mur għandu bit-talb. Irrikorri għandu regolarment; tinsiex tadurah b’tifħir fewwieħ. Titlobx bid-dubju jew ambivalenza. Mat-tħannin tiegħek żid dejjem ir-radd il-ħajr għat-tjieba tiegħu fl-imgħoddi. Qis li se tirċievi dak li qed titlob għalih; għaldaqstant irringrazzja ’l Alla minn issa għall-grazzja tiegħu. Hu jwassallek il-grazzja u int tirrispondi b’ringrazzjament ferrieħi.
“Tħabbtu raskom b’xejn iżda f’kull ħaġa ħalli dak li jkun jeħtiġilkom, ikun imgħarraf ’l Alla bit-talb u bil-petizzjoni u b’radd il-ħajr. U s-sliem t’Alla, li jisboq kull dehen, iħarsilkom qalbkom u moħħkom fi Kristu Ġesù” (Filippin 4:6-7).
Missierek diġà jaf x’jonqsok. Taħbi xejn. Tippermetti li ma jibqa’ ebda bżonn fi ħdanek; għarraf il-petizzjonijiet tiegħek lill-Omnixjenti, bil-fidi. Tirrikorrix għand il-bniedem. Tajjeb kemm hu tajjeb, il-bniedem hu qasba; tistrieħ fuqu u tweġġa’. Ladarba, bil-fidi f’Ibnu, tinsab f’patt mal-Omnipotenti, mur għandu biss, Missier Sidna Ġesù Kristu, li minħabba Ibnu, iħobbok. Iħobbok, mhux b’imħabba sentimentali, iżda b’imħabba li biha jiswielek għall-eternità.
Appena titgħallem tħabbat bieb il-Ġenna jkollok il-paċi, paċi profonda mingħand Alla nnifsu. Ma tkunx kapaċi tifhem għalkollox is-sliem u s-sens ta’ trankwillità spiritwali li tgawdi. Is-serenità fir-ruħ tħaddnek fit-tgħanniqa infinita tagħha. Permezz ta’ Ġesù Kristu, qalbek u moħħok jegħrqu f’baħar ta’ mistrieħ. Sewwa jekk mard jew diffikultajiet, faqar, uġigħ jew tqasqis kontrik – tibqa’ tgħammar fi Kristu, mistkenn minn kull riefnu jew sħab sewdien. Tkun bħall-merill moħbi fix-xaqq tal-blat, għall-irdoss tal-bejta, waqt li t-tempesta tkun fl-agħar tagħha.
Se tobdi dal-kmand prezzjuż? Ingħatalek għall-ġid tiegħek. Tibqax magħluq fik innifsek. Issa li taf fejn hemm riżorsi u potenzjal illimitabbli, tibqax b’idejk fuq żaqqek.
Talba: “Iva, Mulej, nemmnek u nafda fik; iżda, nitolbok, għin in-nuqqas ta’ fidi tiegħi. Niġi għandek, imqar jekk bħalissa nzappap. Tħallinix nissetilja b’tidwiqa żgħira tal-bontà tiegħek. Il-barkiet li tajtni huma kbar, iżda fil-fedeltà tiegħek tibqa’ tagħtini l-barkiet innumerabbli tiegħek. L-għotjiet tiegħek la jqarrqu u lanqas jiddiżappuntaw, għax int ġeneruż u benevolenti. Immotivani biex infittxek aktar, bħaċ-ċerva fix-xagħri li tfittex l-ilma biex tissodisfa l-għatx klubi tagħha. F’isem is-Salvatur tiegħi Ġesù nitolbok dan. Ammen.”
Comments