“Ara, hieni l-bniedem li Alla jwiddbu; għalhekk it-tagħlima tal-Omnipotenti la tbarrihiex. Għax hu jfieri, u jorbot; hu jidrob, u jdejh ifejqu. Minn sitt ħsariet jeħilsek: iva, is-seba’ ma tagħmillikx deni. Fil-għaks jeħilsek mill-mewt, u fil-gwerra mis-setgħa tas-sejf. Int tkun sikur minn sawt l-ilsien, u lanqas tibża’ mill-ħerba meta tiġi. Bil-ħerba u bil-ġuħ inti tidħaq, u lanqas tibża’ mid-dbejjeb tal-art” (Ġobb 5:17-22).
B’dal-kliem Elifaż, wieħed mill-ħbieb ta’ Ġobb, esprima l-verità t’Alla. Jista’ jkollna trabil u saram daqs jiem il-ġimgħa, iżda Alla li ħadem f’dawk is-sitt ijiem għadu jaħdem favur niesu sakemm il-ħelsien tagħhom ikun sħiħ. Qatt u qatt il-Missier ma jaqta’ qalbu minn uliedu; jibqa’ jsus magħhom, jiddixxiplinahom, jesprimi mogħdrija lejhom. Imħabbtu hi infallibbli lejhom, il-merħla ċkejkna iżda tant għażiża ta’ Ibnu.
Aħna nistrieħu fih; fih biss niskopru s-serħan tagħna. Meta l-provi jiġuna waħda wara l-oħra b’suċċessjoni mgħaġla, il-fidi tagħna tkun ittestjata ferm. Inħossuna għaddejjin minn ħuġġieġa tferneż. Qabel ma nkunu stejqirna minn daqqa waħda, nirċievu oħra. Nissupponu illi se nogħxew. Niddubitaw kollox, naraw kollox kbir, u aħna nfusna iċken minn nemlu, u dgħajjef daqsu.
Madankollu, daqshekk ieħor hi mgħaġla s-suċċessjoni ta’ kemm-il darba jeħlisna l-Mulej. Niddixxernu l-id providenzjali tiegħu, u hekk nithennew. Sorprendentement, għanjiet ġodda u hienja jinstemgħu ħierġa minn fuq l-inkwina taħraq tal-gwaj. Il-kunfidenza tagħna hi din: meta l-Mulej jagħtina sitt provi, sitta jkunu, u mhux iżjed. Jaf sa meta, fejn, għaliex, il-kif u kollox.
Jista’ jkun li m’għandna ebda mistrieħ illum, għax ġew fuqna seba’ provi. Allura? “Is-seba’ ma tagħmillikx deni.” Il-ħażen jista’ jhedded. Bħal kelb jista’ jinbaħ għalina, iżda jinsab marbut biċ-ċinga; m’għandux ħila jmissna. In-nifs sħun tiegħu jista’ jdejjaqna, iżda d-dwiefer tiegħu ma jħokkux magħna.
B’ġenbejna mħażżmin sewwa, niffaċċjaw is-sitt jew seba’ ħsarat. Alla hu fidil; ma jġarrabniex iżjed milli nifilħu. Mela nħallu l-biża’ għal dawk li m’għandhomx Missier, u lanqas Salvatur, u lanqas Spirtu qaddis fihom. Il-Kristjan jidher dgħajjef; attwalment hu mgħasses mill-Omnipotenti. Ftakar fil-wegħda: xagħra waħda minn rasna ma taqax mingħajr il-volontà ta’ Missierna.
Talba: “Int ma ħbejtilniex il-fatti, Mulej Ġesù: avżajtna illi se jkollna ngħaddu minn triq dejqa u ristretta; għidtilna minn qabel illi se nkunu mġarrba, kultant anke sa ċerta esremità. Urejtna wkoll għand min nistgħu nirrikorru biex ninħbew fih. Jekk hu meħtieġ illi ngħaddu mill-prova, hekk ikun: biss kun magħna, żommilna l-ħarsa fuqek, tħalliniex nitfixklu. Ħa tkun dik il-fiduċja fik, li tajtna inti stess, il-vittorja li tegħleb id-dinja u t-tnassis kollu tagħha. Uri r-rebħa tiegħek fina u bina.”
Comments