“Tħalli ’l ħadd min jiddisprezzak minħabba ż-żgħożija tiegħek, iżda aktarx kun eżempju għall-kredenti fid-diskors, fl-imġiba, fl-imħabba, fil-fidi u fis-safa. Sakemm niġi applika ruħek għall-qari pubbliku tal-Iskrittura, għall-eżortazzjoni u t-tagħlim. Tittraskurax id-don fik, li kien mogħti lilek permezz ta’ profezija bit-tqegħid ta’ idejn il-presbiterju. Okkupa ruħek b’dawn il-ħwejjeġ, kun assorbit fihom, sabiex il-progress tiegħek ikun evidenti għal kulħadd. Oqgħod attent għalik innifsek u għad-dottrina tiegħek. Ippersisti fihom, għax billi tagħmel hekk issalva kemm lilek innifsek u lis-semmiegħa tiegħek” (1 Timotju 4:12-16).
Biex tiskonġri trid tkun pur. Jekk il-komportament tiegħi ħadd ma jsib x’jgħid fih, il-kunsill u ċ-ċanfir tiegħi jkun bil-wisq aktar aċċettabbli u kredibbli. Jekk qanpiena tkun imxaqqa, ħossha jinstema’ jżarżar. Ikel nutrittiv ma jinżlilniex tajjeb jekk inkunu nafu li l-kok sajjarulna bil-geddum u kontra qalbu. Hekk ukoll meta nfittxu li nagħmlu l-ġid, partikolarment ġid verbali - biċ-ċanfir, korrezzjoni u twiddib - jekk ħajjitna faċilment ssib fiha x’tikkritika, kif tista’ toffri l-kritika tiegħek lil sieħbek? “Kif jista’ għama jmexxi għama?” hi mistoqsija antika minn fomm divin li għadu jidderiġina sal-lum.
Kemm huwa kommendibbli kieku nkun dejjem kwalifikat biex bl-imħabba nikkoreġi lil ħija, imwaqqa’ u possibbilment mgħattan taħt id-dnub, u fl-istess ħin ma nkun qatt nieqes mill-imħabba għalija nnifsi biex nirċievi bl-umiltà ċanfira serja. Bil-grazzja tiegħu Alla kapaċi jagħmilni sottomess biex nieħu dik id-duwa li, għalkemm b’togħma morra, hi l-mediċina ideali għalija f’dis-siegħa u l-mument.
Frattant sikwit nirċievu l-grazzja fil-batal, u ma nagħrfux inħaddmuha għall-avvanz tagħna. Richard Baxter jikkummenta hekk: “Hija waħda mill-mardiet l-aktar perikolużi f’dawk li jipprofessaw il-fidi, u waħda mill-iskandli kbar ta’ żmienna, illi persuni magħrufa bħala eminentement reliġjużi mhumiex kapaċi jilqgħu ċanfira ċara u ġusta. Sakranazz, midgħi jew fornikatur jaċċettaw lewma wisq aħjar minnhom. Dawn it-tip ta’ Kristjani, komuni ħafna, wara li jqattgħu sigħat jew jiem fl-istqarrija ħerqana ta’ dnubhom, u jagħmlu lamentazzjoni sħiħa quddiem Alla u l-bniedem illi ma jistgħux jagħlu aktar bid-dmugħ u dispjaċir, frattant jistmawha bħala inġurja kattiva kontrihom meta xi ħadd jgħidilhom nofs kelma kontrihom, u jikkonsidraw bħala għadu malinn lil kull min isejħilhom bħalma huma jsejħu lilhom infushom.”
Talba: “Eħlisni mill-faċċoliżmu, Sinjur Alla. Ninnota faċilment illi jien kburi u frattant nilgħabha tal-umli; għad hemm is-suppervja fija u frattant irrid nagħti l-impressjoni ta’ qadi; qalbi titbiegħed minnek u frattant inlissen diskors reliġjuż biex ngħatti. Illiberani minn dal-qerq midneb. Għallimni nilqa’ ċ-ċanfir, kemm minn Kelmtek kif ukoll b’fomm ħaddieħor. Agħtini li nimxi fl-indiema, f’ġieħ Ibnek Ġesù.”
Comments