“Int, iva, int tal-biża’; u min jista’ joqgħod quddiem il-preżenza tiegħek meta tkun mgħaddab? Int ġegħilt li l-ħaqq jinstema’ mis-sema; l-art beżgħet u tbikkmet xħin Alla qam biex jagħmel il-ħaqq, biex isalva l-imsejkna kollha tal-art. Tassew, għadab il-bniedem ifaħħrek; il-fdal tal-għadab int titħażżem bih. Wiegħdu u roddu lill-Mulej, Alla tagħkom; ħalli dawk kollha ta’ madwaru jġibulu għotjiet, lilu, li hu tal-biża’, li dak li jifni lill-kbarat u jnissel il-biża’ fis-slaten tal-art” (Salmi 76:7-12).
L-infidili jinkorlaw kontrina. Min-natura tagħhom ma jafux jagħmlu aħjar minn hekk. Ir-rabja tagħhom nissaportuha bħala tikketta tas-sejħa tagħna, sinjal li aħna sseparati u differenti minnhom. “Għalhekk aħna nfusna niftaħru bikom fil-knejjes t’Alla għall-kostanza u l-fidi tagħkom fil-persekuzzjonijiet u l-afflizzjoni kollha tagħkom li qegħdin tissaportu. Dan hu evidenza tal-ġudizzju ġust t’Alla, ħalli tkunu magħdudin denji ta’ saltnet Alla, li għaliha wkoll qegħdin tbatu” (2 Tessalonkin 1:4-5).
Ġesù Sidna jispjegalna illi kieku konna tad-dinja, id-dinja kienet tħobbna, iżda peress li hu għażilna mid-dinja, mela d-dinja ma tirriżerva xejn għalina ħlief l-odju tagħha. Il-faraġ tagħna hu li l-għadab tal-bniedem se jkun maqlub biex jigglorifika iżjed lil Alla. Meta fil-għadab tagħhom il-ħżiena sallbu lil Bin Alla, kienu bla ma jafu qed iwettqu l-għan divin, u f’elf każ ieħor l-ebusija tal-ħżiena qed tagħmel l-istess ħaġa. Jaħsbu li huma liberi, iżda bħall-ħabsin fil-ktajjen qed jikkonfermaw id-digrieti sigrieti tal-Omnipotenti, mingħajr lanqas biss jittendu.
Finalment il-pjanijiet tal-ħżiena jinqalbu kontra tagħhom għar-rovina. Qed jaħdmu b’mod ta’ suwiċidju, u jżarmaw il-kumplotti tagħhom stess. Mill-għadab kollu tagħhom ebda tir ma jolqotna jew iweġġagħna, almenu mhux f’sens permanenti. Meta qatlu l-martri, id-duħħan tal-ħatab jaqbad dardarhom iżjed minn kull ħaġa oħra.
Sadattant, il-Mulej għandu sarima għat-tigri salvaġġi, u katina għall-orsijiet. Jirrestrinġi l-għadab iżjed furjuż tal-għadu. F’dan kollu ma niddubitawx l-għan tajjeb tiegħu lejna. Bħall-inġinier, jaf kif iħaddem ix-xmara, billi juża kemm irid ilma għall-magni tiegħu, u l-bqija jikkontrollah. Ejjew ma nitnegħdux, iżda ngħannu. Kollox sew, jonfoħ kemm jonfoħ ir-riħ. Minkejja t-tempesta se niddaħħlu fil-port.
Talba: “Mulej Alla, kemm inti kbir fil-qawwa u l-ġudizzji tiegħek. Aħna nifirħu u nithennew illi, f’kull avveniment, int involut, għax int is-Sovran suprem. Int twettaq l-intenzjoni kollha tar-rieda tiegħek. Aħna nadurawk bħala s-Sultan universali, renjanti fuq it-tron tas-sewwa tiegħek, għax tiegħek huma s-saltna, is-setgħa u l-glorja għal dejjem. Ammen.”
Comments