“Faħħru lill-Mulej! Faħħru lill-Mulej fis-santwarju tiegħu; faħħruh fil-firxa tas-smewwiet tal-qawwa tiegħu! Faħħruh għall-għemejjel kbar tiegħu; faħħruh għall-kobor tiegħu bla tarf. Faħħruh bid-daqqa tat-tromba; faħħruh bl-arpa u ċ-ċetra. Faħħruh bit-tanbur u ż-żfin; faħħruh bid-daqq tal-kordi u tal-flawt. Faħħruh bid-daqq qawwi taċ-ċimbli; faħħruh biċ-ċimbli jdamdmu. Ħa jfaħħar lill-Mulej kulma jieħu n-nifs. Faħħru lill-Mulej” (Salmi 150:1-6).
Meta l-qalb tissaħħar f’ammirazzjoni grata lejn il-Ħallieq, żelożament tiżbokka u ssejjaħ il-ħlejjaq intelliġenti - anġeliċi u umani - kif ukoll ħlejjaq oħra, u l-ħolqien materjali, biex jifformaw kor wieħed universali, għalenija u armonjuż. Minn hawn nintebħu kemm hi adatta l-qima pubblika t’Alla.
Imma d-dnub ippervertiena. Bħala bnedmin razzjonali u immortali kif nistgħu nkunu mistħija meta ninstabu nfaħħru ’l Alla? X’kuntrast mal-eżerċti tas-sema!
M’hemmx għalfejn tkun espert fl-astronomija biex tħoss l-obbligu raġunevoli li tadura l-Ħallieq ta’ univers hekk vast u affaxxinanti. Ir-ragħaj, il-bedwin, il-baħri, l-artist, il-poeta u l-professur tax-xjenza jistgħu lkoll ikunu ispirati bil-firmament u jissaħħnu f’qalbhom huma u jimmeditaw fuq il-qawwa tremenda t’Alla meta firex is-smewwiet bħal purtiera, u issa jżomm l-istess kosmos skont it-treġija providenzjali tiegħu.
Il-bhejjem, it-tjur u l-ħut fid-diversità tagħhom, kif ukoll il-fattizzi ta’ did-dinja, ukoll jagħtuna x’nifhmu kemm l-għemejjel t’Alla huma fuq skala ta’ manjifiċenza liema bħalha.
L-istudju tax-xjenzi – il-meteoroloġija, il-ġografija, il-botanija, iż-żooloġija – huma l-ikkatalogar u r-riflessjoni tal-opra grandjuża t’Alla fil-ħolqien tiegħu. Bix-xjenza l-bniedem jaħseb il-ħsibijiet t’Alla warajh!
Supremament imissu jadurah il-bniedem, mill-kbir saż-żgħir, kemm slaten kif ukoll tfal, mill-potenti sad-dipendenti, individwalment u korporalment, kemm imħallfin kif ukoll nies komuni, il-virili u l-magħkusin, żgħażagħ u xjuħ, maskili u femminili, ġuvintur u xebbiet.
Il-bniedem huwa l-kuruna tal-ħolqien għax hu morali, inkarigat biex jieħu ħsieb il-ħolqien li minnu jagħmel parti. Hu magħmul xbieha tal-Kreatur tiegħu! Jekk ninsa nfaħħru nkun qed nirrifjuta milli nibbenifika lili nnifsi, fl-aħħar mill-aħħar. It-tifħir, bħat-talb, hu strumentali biex nippromwovu l-maturità tal-ħajja spiritwali tagħna. Jgħinna biex nissollevaw it-tagħbijiet, jiċċitalna t-tama u jsaħħaħ il-fidi tagħna.
Talba: “O Alla ta’ Iżrael, Ħallieq tas-sema u l-art, ta’ kulma jidher u ma jidhirx, int il-bidu u t-tmiem. Qablek ebda alla ma kien ifformat, u warajk ma jkunx hemm ieħor. Int unikament glorjuż, u tgħammar fuq it-tifħir tal-poplu tiegħek! Nixtieq infaħħrek kontinwament, ferventement, ġenwinament, sakemm tagħtini n-nifs. Ħalleluja!”
Comments