“O Mulej, Sid tagħna, kemm hu kbir ismek fl-art kollha! Int li qegħidt il-glorja tiegħek ’il fuq mis-smewwiet. Minn fomm it-tfal u t-trabi int ħriġt il-qawwa, minħabba l-għedewwa tiegħek, biex issikket lill-għadu, u lil dak li jivvendika ruħu. Meta nħares lejn is-smewwiet tiegħek, għemil subgħajk, il-qamar u l-kwiekeb li int għamilt, x’inhu l-bniedem biex int tiftakar fih, u bin il-bniedem biex tieħu ħsiebu?” (Salmi 8:1-4).
Hu sensibbli nenfasizzaw l-essenzjali – il-fidi, it-tama u l-imħabba. M’għandi għalfejn nagħmel xejn biex nimpressjona; tifel ċkejken ma jaf xejn ħlief l-ispontanjetà. Jersaq bla pożi. Hi l-mogħdija li ċertament twassal biex tintwera l-qawwa divina, biex hekk inkun naf x’jiġifieri sliem fit-taqtigħa, konfort fil-għali, saħħa fid-debbolizza, dawl fid-dlam.
Fis-sempliċità u l-onestà tal-fidi wieħed jitgħallem il-paradossi li altrimenti jidhru biss kontradizzjonijiet assurdi. Waħda mill-ifnad hija l-kapaċità u s-sejħa li n-Nisrani jiftaħar bi dgħufijietu – biex il-qawwa ta’ Kristu tistrieħ fuqu. F’ambjent konfortabbli wieħed ma jitgħallimx l-implikazzjonijiet tqal tal-fidi, li jħallu impatt fuqu hekk li jinbidel fix-xbieha ta’ Kristu. Hu biss meta nilħqu l-limiti tagħna illi Alla mbagħad ikollu wisa’ biżżejjed biex jopera fina u bina. Dan eżerċizzju li jrid jirrepeti ruħu kuljum, bħall-irfigħ tas-salib, avolja r-raġuni tħajrek tirreżisti.
Il-fidi ma tistenniex sakemm tifhem kollox, altrimenti ma tkunx fidi. Sejħilha intellett, tagħrif jew loġika, iżda mhux fidi. Ċertament, irridu nkunu nafu l-kontenut tal-fidi (l-Iskrittura Mqaddsa) biex inżommu l-fidi. Imma l-element tat-tagħrif hu element wieħed. Mhuwiex kollox. Fidi li ma tibdillix ħajti ma ssalvalix ruħi, għax ħajti – bil-ħsibijiet, id-diskors u l-atti kollha – hi sinonima għal ruħi. Il-kredu tal-lum isir il-karità t’għada; it-twemmin t’issa t-tjieba prattika t’għada. Jekk mhux hekk, allura l-kredu hu fossila mejta.
Għaldaqstant, minħabba Alla infinit li daħal f’kuntatt reali magħna permezz ta’ Ibnu Ġesù, il-bnedmin sinifikanti. Student midgħi, li ma jaf jagħmel xejn ħlief jitkellem pastaż, hu sinifikanti. Marti, li tħobbni, sinifikanti. In-negozjant u l-impreditur sinifikanti daqs tarbija bi bżonnijiet speċjali f’Nairobi. Int sinifikanti.
Id-diffiċli fl-Iskrittura mhix it-Trinità, lanqas ir-realtà ta’ kastig fl-Infern għall-eternità. Mela x’inhi? L-itqal ħaġa fit-teoloġija din: kif Alla ta kas lill-bniedem midneb, kif qed isejjaħlu lejh, kif irid iħaddnu b’imħabbtu, wara li żvijja vilment minnu. It-traġedja moderna, bħal f’kull ġenerazzjoni oħra, hi din: mhux illi l-bniedem ma jafx dwar Alla, iżda filli jafu, jibqa’ jirreżistih u jwebbes qalbu kontrih.
Talba: “X’sorpriża din, Mulej, illi int ma rmejtniex! Ma ħallejtniex taħt il-kundanna ġusta. Konna bla valur minħabba d-dnub, iżda int poġġejt valur fuqna billi akkwistajtna għalik innifsek bil-prezz li ħallas Ibnek, b’demmu stess. Riskattati bid-demm tal-Ħaruf! O Alla, grazzi talli f’għajnejk aħna sinifikanti, għax int kollok imħabba u ħniena pura. Għinna nwieġbu kif jixraq għall-ħniena tiegħek.”
Comments