“Min jimxi mal-għorrief isir għaref, iżda min jagħmilha mal-boloh isofri l-ħsara. Warrab minn quddiem iblah, għax ma tarax fih xofftejn l-għerf. Titħabbibx ma’ min jitmasħan, u la timxix ma’ min jagħdab, li ma titgħallimx drawwietu u ġġib xkiel għal ruħek. Min iħobb l-għerf iferraħ lil missieru, iżda min jagħmilha man-nies ħżiena jaħli ġidu” (Proverbji 13:20; 14:17; 22:24-25; 29:3).
“Għidli ma min tagħmilha u ngħidlek x’int,” spiss tennew missirijietna ma’ xulxin. Naqbel għalkollox ma’ dal-ħsieb. In-nies li titħallat magħhom jinfluwenzawk, sew għat-tajjeb kif ukoll għad-deni. Jekk ħbiebek u sħabek ma tantx iħabblu rashom fuq il-ħwejjeġ li għandhom x’jaqsmu m’Alla, jitkellmu laxk u ħsiebhom fil-pjaċiri tad-dinja, int ukoll eventwalment issir tixbahhom. Illum qabel għada tiskopri kif int ukoll ftit li xejn taħseb fuq Alla, int ukoll titkellem kif ġie ġie, u l-attrazzjonijiet terrestri ssibhom jagħmlu bik, tant li jnessuk il-ħwejjeġ eterni tas-sema. “Min jagħmilha maz-zopp isir bħalu.”
Fis-soċjetà tagħna, irridu nsemmu wkoll il-kotba, ir-revisti, ir-radju u t-televiżjoni, u fuq kollox l-internet. Dawn ukoll huma “sħab” tagħna. Attent x’taqra, x’tisma’ u x’tara fuq il-mezzi tax-xandir. L-influwenza tagħhom hi enormi. Jekk ma tkunx pożittiva, topera b’mod sovversiv għad-dannu tiegħek innifsek.
Forsi xi ħadd jistaqsi: “Teħodha bi kbira għax wieħed joqgħod jaqra r-revisti, isegwi l-isports jew jara t-telenovelas? B’daqshekk waqgħet id-dinja?” Nippreferi nistaqsi: “X’hemm pożittiv u profitabbli fihom? Qed jibnuk fil-karattru? Qed jedifikawk fil-fidi fi Kristu l-Mulej, u fl-imħabba lejn ħutek? Se tirċievi kuruna meta tidher quddiem it-tribunal ta’ Kristu għal dak l-ammont enormi ta’ ħin li ħlejt taqra letteratura dubjuża, tara programmi trivjali fuq it-televiżjoni, u tuża l-internet bla skop nobbli?
Taħsibx li rrid nindaħallek fil-kuxjenza; nixtieq biss li l-kuxjenza tiegħi u tiegħek tkun imdawla minn dal-prinċipju bibliku. “Min jimxi mal-għorrief isir għaref, iżda min jagħmilha mal-boloh isofri l-ħsara.”
Talba: “Mulej, nirrealizza illi l-kumpanija ma tikkonsistix biss f’persuni oħra, sew jekk huma ħbiebi jew sħabi fuq il-post tax-xogħol. Tikkonsisti wkoll f’kulma għandu ħabta jinfluwenzani. Ħa jkolli għassa fuqi nnifsi biex nagħraf x’kotba naqra, xi programmi nsegwi, kif ukoll kif u sakemm nuża l-internet. Tħallini naqa’ skjav ta’ ħadd u xejn, ħlief ta’ Ibnek illi jagħtini d-dawl u l-qawwa tiegħu, sabiex nogħġbu f’kollox.”
Comments