“Għaldaqstant, saħħu l-idejn debboli u l-irkopptejn mitluqa u ‘agħmlu mogħdijiet dritti għal saqajkom,’ sabiex iz-zopp ma jisfax inkapaċitat imma aktarx jitfejjaq. Agħmlu kull sforz biex iżżommu s-sliem ma’ kulħadd, u għall-qdusija, li mingħajrha ħadd mhu se jara s-Sid. Oqogħdu attenti ħalli ma jkunx hemm xi ħadd li jonqos mill-grazzja t’Alla, li ma jkunx hemm xi għerq ta’ mrar li jisponta ’l fuq biex jiffastidjakom u b’dan ikunu kkontaminati l-ħafna. Ħsiebkom hemm li ma jkunx hemm xi fornikatur jew profan bħal Għeżaw, li għal ikla waħda biegħ l-primoġenitura tiegħu. Tafu illi wara, meta xtaq jiret il-barka, kien irroftat, għax ma sabx ċans għall-indiema, għad li fittixha bid-dmugħ” (Ebrej 12:12-17).
Biex inkompli nissaħħaħ fil-fiduċja tiegħi fil-Mulej, irid ikolli l-ambizzjoni għas-santifikazzjoni, u t-tfittxija tagħha. Lhud 11 jilħaq il-klajmaks u l-applikazzjoni tiegħu f’kapitlu 12:1: “Immela aħna, billi għandna mdawra madwarna sħaba daqshekk kbira ta’ xhieda, ħa nwarrbu kull xkiel u d-dnub tant faċilment fixkieli, u ħa niġru bil-perseveranza t-tellieqa mqiegħda quddiemna.”
Fidi u qdusija, mela, huma abbinati flimkien, u jseddqu lil xulxin. Il-fidi ma tistax tiffjorixxi fija jekk it-taqbida kontra d-dnub personali mhix kondotta bir-riżorsi kollha għad-dispożizzjoni tiegħi. Il-mortifikazzjoni tal-vizzju u l-vivifikazzjoni tal-virtù jmorru id f’id. Meta ninsa jew nittraskura l-vokazzjoni tiegħi għall-qdusija, il-fidi titgħaxxex. Nidentifika d-dnub, nindem minnu (mhux ġeneralment, imma speċifikament), u nwiegħed lill-Mulej li se nissielet biex neqred il-fdal tal-ħażen fija. Il-mixja tiegħi suppost hi waħda fl-imħabba, fid-dawl, fid-dehen u b’kull ċirkuspezzjoni.
Fattur ieħor biex nikber fil-fidi huwa dan: nirrispetta l-Providenza divina. Dejjem hemm pjan u skop għal ulied Alla. Ebda avveniment mhu superfluwu. Jekk inħares lejja nnifsi bħala sufrun f’wiċċ l-ilma, jixxejjer bl-addoċċ, inkun virtwalment irmejt il-fakoltà tal-fidi. Alla hu s-suprintendent ta’ ħajjitna. Jekk nagħraf dan, flok qrusa, uġigħ u frustrazzjoni, qalbi timtela b’timenza u ammirazzjoni lejn il-Feddej tiegħi.
Irrid ukoll inrawwem fija perspettiva altruwista, aktarx milli ‘Jien hu Alla Sidi.’ Id-direttiva hi ċara: “Kull wieħed m’għandux iħares lejn l-interessi tiegħu nnifsu biss, iżda wkoll lejn l-interessi tal-oħrajn” (Filippin 2:4). Jekk ma nadattahiex bħala r-regola tiegħi nkun ssoprimejt il-fidi attiva tiegħi fir-rieda rivelata t’Alla għalija. Nagħti, flok sempliċement ħsiebi biex nirċievi. Naqdi, inħobb, għax hekk insir nixbah l-aktar lil Ġesù, u allura inevitabbilment nimmatura fil-fidi.
Talba: “Sinjur Alla, niddependi fuqek għat-tisħiħ u l-effettività. Fakkarni dejjem illi l-qima tiegħi trid tkun tinvolvi l-fakoltajiet kollha, inkluż il-ħsieb. Kwalunkwe prinċipju li nsib fl-Iskrittura għallimni nieħdu bis-serjetà u impenn. Seddaqni biex neżerċita dixxiplina fuqi nnifsi, ħalli nagħmel progress fil-fidi. Ammen.”
Comments