“F’dak il-jum titgħanna din l-għanja f’art Ġuda: ‘Għandna belt qawwija; il-Mulej jagħmel il-ħelsien bħala swar u ħitan ta’ barra. Iftħu l-bwieb, biex jidħol il-ġens ġust, li jħares is-sewwa. Inti żżommu fi sliem perfett lil min moħħu jistrieħ fik, għax jafda fik. Ittamaw fil-Mulej għal dejjem, għax fil-Mulej Alla għandna blata ta’ dejjem. Għax hu jniżżel lil dawk li joqogħdu fl-għoli; hu waqqa’ sal-art il-belt li qiegħda fl-għoli; jitfagħha mal-art, imqar fit-trab’” (Isaija 26:1-5).
Huwa x-xogħol tal-fidi illi biha nirriżenjaw u nċedu r-rieda tagħna lil Alla. Meta nċedu l-volontà tagħna lil Alla nkunu qed nafdawh bina nfusna. Inħallu lilu jieħu ħsiebna u jipproteġina.
Fi żmien il-għawġ, il-bniedem jaqbad mal-wegħdi t’Alla u japplikahom għalih innifsu. Imma kif nistgħu napplikaw il-promessi divina jekk mhux bil-fidi? Jekk tabib iwiegħed il-fejqan, trid tafda fih, ċoè, tmur il-klinika għandu, tisma’ x’għandu xi jgħidlek, tissottometti għat-trattament tiegħu, u tieħu l-mediċina skont il-preskrizzjoni tiegħu. Altrimenti ma tkunx qed tafdah; il-wegħda tiegħu ma tkunx għamiltha tiegħek.
Hu x-xogħol pekuljari tal-fidi illi tilmaħ id Alla f’kull dispensa, fil-ġid u d-deni, fil-mard u s-saħħa, fil-għana u l-faqar. “Il-Mulej jagħti u l-Mulej jieħu,” tgħid il-fidi (Ġobb 1:21). “Jien bqajt immutat u ma ftaħtx fommi, għax int, Mulej, għamilt dan,” tgħid l-istess fidi (Salmi 39:9).
Proprjament il-fidi taħdem billi tara d-dehra sħiħa, tħaddan ir-realtà kollha, mhux nofsha. Il-providenza lejna tista’ tkun mudlama jew imdawla. Is-sens u r-raġuni umana jikkonkludu li Alla hu magħna fid-dawl, imma mhux fid-dlam. Il-fidi tisħaq, “Le, Alla hu magħna kull ħin, sew jekk bi nhar kif ukoll billejl. U għalkemm id-dmugħ idum għal lejl wieħed, il-ferħ jiġi filgħodu.” Il-fidi tisma’ lil Alla meta jgħid, “Nagħtikom bieb ta’ tama f’wied Akor” (Ħosegħa 2:15). “Il-Mulej ikollu ħniena mill-qaddejja tiegħu xħin jara li saħħithom marret, u li ma baqax aktar fosthom la lsir u lanqas ħieles” (Dewteronomju 32:36).
Il-fidi hi persważa li Alla jissokkorri, jaf minn xiex aħna għaddejjin, u għandu l-ħin u l-mod tiegħu kif joħroġna għad-dawl. “Għax il-Mulej isalvahom, għax jafdaw fih” ( Salmi 37:40).
Meta wieħed jestendi l-fidi tiegħu, u jħaddimha b’dal-mod, żgur jibqa’ trankwill u ħieles mill-iskuraġġiment. Il-fidi kapaċi timxi f’dil-mogħdija, u hekk tagħmel. Ċertament, mela, il-fidi u l-fidi biss hi dik il-grazzja li twieżen u ssaħħaħ il-qalb kontra kull avversità u skoraġġiment.
Talba: “Mulej sovran u ħanin, urina l-glorja u l-eċċellenza tiegħek aktar u aktar, sabiex daparti tagħna, imqanqla mill-Ispirtu tiegħek, nesprimu r-rispons xieraq billi nafdawk. Għax is-salvazzjoni tagħna kollha, fil-partijiet u l-aspetti tagħha, hi miġbura fi Kristu Ibnek. La rridu, la nistgħu u lanqas għandna għalfejn infittxuhom band’ oħra. Grazzi talli fih aħna kompluti. Ammen.”
Comments