“Lill-anġlu tal-knisja f’Efesu ikteb: ‘Dawn il-ħwejjeġ jgħid dak li jżomm is-seba’ kwiekeb f’idu l-leminija, li jimxi fost is-seba’ kandelabri dehbin. Naf l-għemejjel tiegħek, it-taħbit u l-perseveranza tiegħek. Naf illi ma tistax tittollera l-ħżiena, u ttestjajt lil dawk li jsejħu lilhom infushom appostli, iżda mhumiex, u sibthom foloz. Naf illi għandek il-kostanza u ssaportejt minħabba ismi, u m’għejjejtx. Madankollu għandi dan kontrik: ħallejt l-ewwel imħabba tiegħek. Ftakar mela mnejn waqajt! Indem u agħmel l-opri li għamilt għall-ewwel. Altrimenti se niġi għandek u nneħħi l-kandelabru tiegħek minn postu, jekk ma tindimx’” (Rivelazzjoni 2:1-5).
Inizjalment insiru wlied Alla bit-twelid mill-ġdid, fejn tingħatalna l-abbiltà biex nindmu u nemmnu l-evanġelju. L-indiema, flimkien mal-fidi, twassal għall-ħajja eterna. Mingħajrha ma nistgħux insalvaw. Minn qagħda ta’ telfien u kundanna ninġiebu f’qagħda ta’ salvazzjoni u grazzja, fejn għandna l-opportunità naqdu ’l Alla.
Inevitabbilment, minkejja l-isforzi kollha tagħna, minħabba l-fdal tad-dnub, se nonqsu lil Alla anke bħala wliedu. Bħala dixixpli, Ġesù jgħallimna biex nitolbu, “Aħfrilna dnubietna.”
Hemm differenza bejn indiema bħala wieħed mitluf, u ndiema bħala dixxiplu li diġà jinsab fis-saltna. Imma f’ċertu sens ieħor hi l-istess indiema, estiża, kontinwa, li għadha ħajja u effettiva. Mhux indiema ta’ ġurnata fil-passat, u daqshekk. Il-Kristjan jgħix ħajja ta’ ndiema. Bħalma nemmnu fil-bidu, u nibqgħu nemmnu matul ħajjitna, hekk ukoll nindmu malli nkunu riġenerati u nibqgħu bi spirtu niedem u qalb sogħbiena. Hija r-regola, in-norma ta’ ħajjitna. Mhux esperjenza waħdanija fil-passat.
Meta l-Kristjan jindem jagħmel dan “għas-salvazzjoni” (ara t-2 Korintin 7:1-17). Ovvjament mhux qed jiffereri għall-konverżjoni inizjali; qed jalludi għall-kobor u l-progress fil-ħajja Kristjana. “Salvazzjoni” hawn hi wżata bl-istess sens bħal meta jingħad li jmissna nħaddmu s-salvazzjoni tagħna bil-biża’ u t-tregħid (Filippin 2:12-13).
Il-Korintin, Pietru u David kollha nidmu bħala wlied Alla. Ladarba jkun hemm konverżjoni ġenwina fil-bidu, l-effetti tagħha jibqgħu. Il-Kristjan, avolja mhux eżentat milli jiżbalja bl-ikrah, xi darba jew oħra jerġa’ lura fi ħdan il-Missier.
Talba: “Ferra’ fina, Missier smewwieti, dik il-grazzja li biha ngħixu minn ġurnata għall-oħra bħala nies niedma quddiemek, għax aħna m’aħna xejn ħlief trab u rmied, dipendenti għalkollox fuq il-ħniena tiegħek. Dawwarna lejk u ħalli wiċċek jiddi fuqna. Ilqagħna kif aħna, iżda tħalliniex kif aħna. Hekk ikun.”
Comments