“Fl-għajnejn l-iblah, triqtu tajba, iżda min jisma’ l-parir hu għaref. Il-ġlied jiġi biss mill-kburija, iżda l-għerf qiegħed ma’ dawk li jieħdu parir. Il-ħsibijiet ifallu fejn m’hemmx ftehim, iżda fejn hemm ħafna kunsilieri jseħħu. Isma’ l-parir u ilqa’ t-twiddib biex issir għaref tul ħajtek. Rajt bniedem jidhirlu li hu għaref? Hemm aktar tama għall-iblah minnu” (Proverbji 12:15; 13:10; 15:22; 19:20; 26:12).
Hemm min jaf ftit wisq, iżda għallinqas jinduna u jammetti li hu injorant. Imma ssib ukoll persuna li mingħaliha xi enċiklopedija ta’ għerf, u fil-fatt hu vojt daqs bużżieqa minfuħa. Il-Bibbja tgħid li hemm aktar tama għall-iblah minnu. L-iblah, jekk jammetti l-injoranza tiegħu u jfittex l-għerf isibu, filwaqt illi min jidhirlu li jaf ma jħossx il-bżonn jitgħallem u jibqa’ jgħix fid-delużjoni tiegħu.
Meta kont għadni l-iskola, kont naf kollox. Ara jien jekk kellix naqa’ għall-parir tal-ġenituri jew is-superjuri tiegħi! Ma nafx x’ġara eżatt: bil-mod il-mod bdejt nitlef dak l-għerf kbir li kelli u llum kważi ma fadalli xejn minnu.
Kien hemm żmien meta kont professur tal-Iskrittura – saħansitra kont naf il-Grieg ukoll. Staqsini fuq xiex trid u nwieġbek. Illum qed nintebaħ bl-injoranza tiegħi – u dan ngħidu b’sinċerità.
Kif tqis lilek innifsek? Kulħadd bil-kliem jammetti l-umiltà tiegħu, u li fadallu x’jitgħallem. Fil-fond ta’ qalbek tqis lilek innifsek għaref? Dawn huma mistoqsijiet intiżi biex jgħinuk tintebaħ jekk intix wieħed minn dawn. Sikwit taqra u tistudja l-Iskrittura biex titgħallem kif tgħix u ssolvi l-problemi tiegħek? Sikwit tieħu parir mingħand xi ħadd li tqisu matur u jaf il-Bibbja sew fl-esperjenza tiegħu? Toqgħod attent waqt il-prietki li jsiru fil-knisja? Għandek diffikultajiet u mistoqsijiet dwar il-fidi?
Talba: “Missierna smewwieti, int tħares lejn l-umli, iżda l-kburi tiddistakka ruħek minnu. Mela eħlisna minn din in-nasba meta nassumu li nafu xi ħaġa. Għallimna, Mulej, li ma nafu xejn, ħlief li bil-grazzja tiegħek għarafniek, u li x-xewqa tagħna għandha tkun li nsiru nafuk aktar u aktar, permezz ta’ Ġesù, l-isplendur tal-glorja tiegħek u r-rappreżentazzjoni eżatta tan-natura tiegħek. Ammen.”
Comments