“It-tielet darba din li ġej għandkom. ‘Fuq l-evidenza ta’ żewġ xhieda jew tlieta tkun stabbilita kull materja.’ Avvertejtkom diġà meta kont preżenti t-tieni darba, u avolja issa assenti se nwissi minn qabel lil dawk li dinbu fil-passat u lill-oħrajn kollha, illi jekk nerġa’ niġi, m’inix se niffrankahielhom, ġaladarba qed tiddomandaw prova illi Kristu qed jitkellem bija. Mhuwiex dgħajjef fit-trattament tiegħu magħkom, iżda setgħan fostkom. Għax tabilħaqq issallab fid-dgħufija, frattant jgħix bis-setgħa t’Alla. Aħna wkoll dgħajfin fih, iżda se ngħixu miegħu bis-setgħa t’Alla diretta lejkom biex inservukom” (2 Korintin 13:1-4).
Pawlu ma kienx lest iċedi l-awtorità appostolika fuq il-knisja, hi liema hi. Ma kienx faċilment se jħalli xogħol il-Mulej itir mar-riħ, turija tad-dmir u l-interess qawwi li kellu fis-safa, fil-qawwa spiritwali u l-perseveranza tagħhom.
L-ekwivalenti għal-lum hija s-supremazija tal-Iskrittura fuq kull sfera ta’ ħajjitna, sewwa jekk x’nemmu jew kif inġibu ruħna. Bħalma Kristu tkellem bil-fomm u bl-ittri ta’ Pawlu u l-appostli l-oħra, hekk illum jindirizzana u jiggwidana bil-Kelma, applikata mill-Ispirtu tiegħu.
Mela l-awtorità li Pawlu jesprimi hija investita fl-Iskrittura. Hi l-mexxej tagħna, għax biha Kristu jiddereġina. Pawlu kien determinat jeżercita din l-awtorità investita fih. Għaldaqstant jistabbilixxi diversi prinċipji biex jiġu applikati. L-ewwel nett, ifakkar lill-Korintin li meta jasal fosthom l-akkużi kollha jkunu kkonsidrati bil-fer u trattati b’mod ġust. Din l-awtorità mhix kapriċċjuża jew ġdida: infatti jikkwota mid-Dewteronomju. Hi politika antika li Alla nnifsu stabbilixxa.
Kwalunkwe mexxej m’għandu ebda dritt joħloq minn żniedu jew jippromulga xi “liġi kanonika,” kif sfortunatament ġara fi ħdan il-knisja Rumana. Lanqas l-Evanġeliċi mhuma eżenti minn dal-periklu.
Imma kull fejn jinstab id-dnub l-awtorità spiritwali ma tistax tegħmeż u tiffrankaha lil min qed jgħaffeġ fid-diżubbidjenza. Tagħti ċ-ċans u l-ħin għall-indiema, imma d-dnub irid jiġi trattat bla dewmien, bla kompromess u radikalment. Altrimenti jibla’ l-komunità sħiħa, sew jekk ikun falliment fid-dottrina u l-fidi, kif ukoll jekk hi żelqa morali.
Talba: “Bħala l-familja tiegħek, Missier, agħtina illi jkun jimportana minn xulxin, filli neżortaw u nagħmlu l-qalb lil xulxin sabiex nibqgħu bla ma ngħejjew jew nogħxew fit-triq. Ħa nkunu dixxiplinati; iffortifikana bil-grazzja tiegħek. Ħa nkunu bieżla fl-użu ta’ kull mezz għad-dispożizzjoni tagħna biex nissaħħu spiritwalment. Ammen.”
Comments