“Kliem il-ħżiena hu nassa għall-ħajja, iżda fomm in-nies retti jagħi l-ħelsien. Bil-frott ta’ fommu l-bniedem jixba’ bil-ġid, u kulħadd jitħallas skont għemil idejh. Min jgħid is-sewwa jgħid dak li hu ġust, iżda xhud giddieb jgħid ħaġa b’oħra. Xofftejn is-sewwa jżommu sħiħ għal dejjem, iżda lsien giddieb hu għal waqt wieħed. Xhud tajjeb isalva l-ħajjiet, iżda xhud falz jgħid il-gideb. Xofftejn ġusti huma l-għaxqa tas-slaten, u huma jħobbu lil min jitkellem is-sewwa. Min iħares fommu u lsienu jħares ruħu mill-għali” (Proverbji 12:6,14,17,19; 14:25; 16:13; 21:23).
Minn diskorshom wieħed jista’ jiddistingwi lil ulied Alla minn ulied id-dinja. Immexxija minn Satana, missier il-gideb, il-mitlufa huma bħal missierhom, giddieba. M’għandhom ebda rispett lejn il-verità. Il-gideb hu magħġun f’ħajjithom, kemm jekk hu gideb sfaċċat jew aktar fin. Il-mifdija, bħal Sidhom li stqarr, “Jien hu l-verità,” iħobbu l-verità, jimxu fiha u jistkerrhu l-gideb.
Il-verità mhux dejjem faċli tgħidha. Tista’ ġġibek fl-inkwiet. Titlob lill-ħati jikkundanna lilu nnifsu. Sokrate, l-istorjografu ekkleżjastiku, jirrapporta ġrajja dwar wieħed Pambo, raġel komuni u injorant. Dan invista duttur għaref, u xtaqu jgħallmu xi salm jew qawl. Id-duttur beda jaqralu minn Salm 39: “Għidt jien: ‘Noqgħod attent għal triqati, biex ma nidnibx bi lsieni; sarima nqiegħed fuq fommi…”
Lanqas laħaq spiċċa l-ewwel vers illi Pambo talbu jagħlaq il-ktieb u telaq, wara li qallu illi appena jitgħallem dil-lezzjoni jerġa’ jiġi għal aktar. Wara assenza ta’ xi xhur, il-qarrej tiegħu rah fit-triq u qallu meta jkun lest biex jagħtih it-tieni lezzjoni.
Pambo wieġbu, “Għadni ma tgħallimthiex sewwa l-ewwel waħda.”
U disgħa u erbgħin sena wara ta l-istess tweġiba lill-istess duttur.
Niżbaljaw bi lsienna, iva, imma l-Kristjan lest jammetti l-iżbalji. Ma jistax ibill subgħajh fid-dixx tad-dinja ħażina tal-lum, la bl-għemil u lanqas b’diskorsu.
Ġid id-dinja hu vanità, u għomorna hu biss mument fuq sfond l-eternità. Għalhekk jgħid, “Xofftejn is-sewwa jżommu sħiħ għal dejjem.” Alla japprova u jonora lil dawk li jgħidu l-verità. “Mulej, min jgħammar fit-tinda tiegħek? Min joqgħod fuq l-għolja mqaddsa tiegħek?” jistaqsi t-twajjeb. Iwieġeb minnufih, “Min jimxi bla ħtija, u jagħmel il-ħaqq, u jgħid is-sewwa f’qalbu” (Salmi 15:1-2).
Il-giddieba jifformaw qatgħa differenti. Dawn, għalkemm igawdu għal ftit it-taħrif u l-manikati tagħhom, u jiffrankaw ħafna nkwiet billi jaħbu jew jgħawġu l-verità, huma għal waqt wieħed. Għax anke jekk tul ħajtu kollha jibqa’ ma jinkixifx, x’inhu għomor wieħed għal ħdejn l-eternità? Jekk il-bnedmin ma jindunawx bil-qerq tiegħu, min se jirnexxilu jaħbih mill-għajnejn, qishom fjamma nar, tal-Mulej Ġesù Kristu?
Talba: “Mulej, ma tħallina f’ebda dubju illi naħsdu biss dak li niżirgħu. Forsi mhux dakinhar stess, imma ċertament li l-ħsad jasal. Għallimna nħobbu l-verità sabiex naħsdu l-frott bnin tal-paċi u l-hena. Eħles lil dawk li qed jiffangaw fil-gideb u diżubbidjenza oħra sabiex ma jkollhomx għalfejn jitqannew bil-frott qares tal-għadab ġust tiegħek.”
Comments