“Għax jien ngħaddi mill-art tal-Eġittu dik il-lejla, u nidrob kull imwieled tal-ewwel fl-art tal-Eġittu, sew bniedem u sew bhima; u nagħmel ħaqq mill-allat kollha tal-Eġittu. Jiena l-Mulej. U d-demm ikun għalikom bħala sinjal fuq id-djar fejn tkunu, u malli nara d-demm, jien naqbiżkom, u l-ebda ħsara ma tiġi fuqkom biex teqridkom, meta jien nidrob l-art tal-Eġittu. U dan il-jum ikun għalikom b’tifkira, u tħarsuh bħala għid lill-Mulej minn nisel għal nisel tagħkom; tħarsuh bħala għid b’liġi għal dejjem” (Esodu 12:12-14).
Bil-fidi nara d-demm prezzjuż. Dan jiswieli ta’ faraġ. Il-Mulej Alla jarah ukoll, u jiswieli għas-sigurtà tiegħi. Anke meta niddgħajjef fil-fidi, u tiċċajpar il-vista spiritwali tiegħi, il-Mulej xorta waħda jara demm il-Ħaruf. Minħabba fih jibqa’ għaddej. Jekk forsi nħossni kommoss, peress li l-fidi tiegħi tperper, madankollu xorta waħda jien sikur, għaliex għajnejn il-Mulej ma jgħajjew qatt, u jara d-demm tas-sagrifiċċju fuq il-Kalvarju b’ħarsa fissa. X’ferħ hu dan għalija!
Il-Mulej jara t-tifsira fonda u ġewwiena, il-milja infinita ta’ dak kollu li tfisser il-mewta ta’ Ibnu l-għażiż. Jaraha b’memorja mistrieħa ta’ ġustizzja sodisfatta, u l-attributi kollha tiegħu glorifikati. Ra l-ħolqien fil-progress tiegħu, u qal, “Hu tajjeb wisq.” X’jgħid għall-fidwa fil-milja tagħha? X’jgħid dwar l-ubbidjenza perfetta ta’ Ibnu, li wasal biex sofra s-salib? Xejn ma jista’ jispjega s-sodisfazzjon tal-Missier, li jitgħaxxaq f’Ibnu Ġesù. Il-Missier ixomm il-fwieħa tas-sagrifiċċju tal-Kalvarju li preżenta Ġesù Kristu, sagrifiċċju bla għajb u bla tebgħa.
Issa nistgħu nlebbtu ruħna f’sigurtà kalma. Għandna s-Sagrifiċċju u l-Kelma t’Alla biex joħolqu fina sens profond ta’ sigurtà perfetta. Il-Mulej jaqbiżna. Bilfors jibqa’ għaddej, għax il-kastig li kien imiss lilna, diġà ħadu Ibnu minflokna, u Alla ma jiddomandix il-kastig darbtejn. Il-ġustizzja t’Alla ħadet b’idejn l-imħabba tiegħu biex provdiet salvazzjoni dejjiema għal dawk imraxxin bid-demm tal-Ħaruf.
Talba: “Ħaruf t’Alla li tneħħi d-dnubiet tad-dinja, ilqa’ l-lodi u l-adorazzjoni tagħna! Denju int biex tieħu l-iskroll u tiftaħ is-siġilli tiegħu, għax inqtilt, u b’demmek xtrajtna għal Alla tiegħek u Alla tagħna – persuni minn kull tribù u lsien u poplu u ġens. Inroddulek ħajr talli kkostitwejtna saltna u saċerdoti għal Alla Missierna. Lilek nattribwixxu t-tifħir u l-unur u l-glorja u l-potenza għal dejjem ta’ dejjem!”
Comments