“Il-bluha mqabbda ma’ qalb ta’ tifel, iżda l-ħatar tat-twiddib ibegħidha minnu. Min iħares il-liġi hu iben għaqli, iżda min jagħmilha maż-żaqqieqa jagħmel għajb lil missieru. Il-ħatar u t-twiddib jagħtu l-għerf, iżda t-tifel mitluq għal rajh jagħmel għajb lil ommu. Widdeb lil ibnek u jhennik; iva, hu jkun l-għaxqa ta’ qalbek. Min ifissed minn tfulitu l-ilsir, dan jispiċċa biex fl-aħħar ikun irid isir ibnu” (Proverbji 22:15; 28:7; 29:15,17,21).
Bħalma l-ulied huma kmandati minn Alla biex jobdu l-ġenituri tagħhom f’kollox, hekk ukoll il-ġenituri għandhom l-ordni mingħand l-istess Ħallieq biex iwiddbu lil uliedhom fit-tagħlim u t-twiddib tal-Mulej.
Din hi verità sempliċi u luċida: kull min għandu moħħ jista’ jifhimha. Madankollu ħafna ġenituri konvenjentement iwarrbu l-kmandament t’Alla, u flok imexxu lil uliedhom fi triq is-sewwa, jitilquhom għal rajhom. Indubjament, id-dmir tal-ġenituri hu peżanti, u fih sfida biex jitwettaq b’dinjità u suċċess. Imma Alla jagħti grazzja ’l min jobdih, biex Kelmtu titlaħħam fih u hekk jirrifletti l-glorja t’Alla fuqu. Għalhekk, intom ġenituri, agħmlu l-qalb, u fittxu obdu ’l Alla u rabbu l-ulied li fada f’idejkom skont is-sewwa.
Tagħmlux bħalma jagħmlu n-nies tad-dinja. F’isem il-libertà u t-tolleranza jħallu lit-tfal jagħmlu li jridu, tajjeb jew ħażin; jagħtuhom permess jgħaffġu u jħawdu, virtwalment bla gwida u direzzjoni. Indħil mill-inqas, u meta tintervieni, istmahom bħala ħbieb, mhux bħala wlied. Mentalità fjakka u irresponsabbli, ikolli ngħid!
X’jiġri, inevitabbilment? It-tfal, fi bluhathom, jagħmlu lill-ġenituri tagħhom xejn aħjar minn skjavi, tapit taħt saqajhom. Ħafna ġenituri spiċċaw b’qalbhom maqsuma minħabba l-ardità, l-arrroganza, l-ingratitudni u d-diżubbidjenza sfaċċata ta’ wliedhom. Jikkonfermaw, b’għali għalihom infushom, il-verità li jekk ma turix interess biżżejjed fit-tifel, la jikber, it-tifel lanqas juri interess fik.
Talba: “O Mulej, kemm hu importanti u kruċjali illi aħna l-ġenituri nifhmu u nimpenjaw ruħna fit-trobbija xierqa ta’ wliedna. Apparti metodoloġija prudenti, neħtieġu wisq aktar l-għerf mingħandek u d-dedikazzjoni. Nirrikorru għandek biex timlielna n-nieqes tagħna. U aħfrilna t-traskuraġni tagħna f’dan il-qasam. F’isem Ibnek Ġesù. Ammen.”
Comments