“Dan kollu hu mingħand Alla, li rrikonċiljana miegħu nnifsu permezz ta’ Kristu u tana l-ministeru tar-rikonċiljazzjoni, ċoè, Alla kien qed jirrikonċilja d-dinja miegħu nnifsu fi Kristu, bla ma jgħodd l-offiżi tagħhom kontrihom. U kkommettielna l-kelma tar-rikonċiljazzjoni. Mela aħna ambaxxaturi għal Kristu, bħallikieku Alla qed jappella permezz tagħna. Nimplorawkom għal Kristu: kunu rikonċiljati m’Alla. Lil dak li ma kienx jaf dnub Alla għamlu dnub għalina, sabiex aħna nsiru l-ġustizzja t’Alla fih” (2 Korintin 5:18-21).
Fl-evanġelju, ir-rikonċiljazzjoni hi l-bidla ta’ relazzjoni bejn Alla u l-bniedem: fejn qabel kienet maqtugħa u diżastruża, issa r-relazzjoni hi msewwija. L-unika relazzjoni kienet dik bejn kriminal ħati quddiem l-Imħallef rett, li ma jinxtarax. Issa, bil-mewt ta' Kristu, il-qagħda t’Alla lejna nbidlet.
Għaliex kien hemm bżonn ta’ rikonċiljazzjoni? L-għadwa u l-avversità tagħna kontra Alla, bid-dnub, qanqlet l-oppożizzjoni qaddisa t’Alla kontra kull dnewwa u ħażen. Id-diżubbidjenza tagħna xegħlet l-għadab ġust tiegħu kontrina. L-inikwità tagħna stiednet il-ġudizzji tiegħu fuqna, u l-ħażen tagħna ġab fl-operazzjoni inevitabbli l-vendetta u l-kastig retributtiv t’Alla. Finalment konna ninsabu taħt is-saħta ta’ Liġi miksura u diżonorata.
Bir-rikonċiljazzjoni sseħħ bidla tremenda: l-istat ta’ għadwa u avversità hu mibdul fi stat ta’ sliem u xirka dejjiema. Fir-restawr tar-relazzjoni mħarbta bejn Alla u l-bniedem ribelluż, “kollox hu minn Alla.” Aħna mgħarrfa illi “kull min jemmen…ikollu l-ħajja eterna” (Ġwanni 3:16), imma ma jgħidilniex “min jemmen” kif jasal biex jemmen. Dan insiru nafuh band’ oħra (2 Korintin 5:18-21). Alla hu s-suġġett tal-proċess rikonċiljattiv kollu. Bil-grazzja tiegħu jilħaq imqar l-għedewwa pessmi tiegħu. Mhux il-bnedmin jirrikonċiljaw lil Alla, imma Alla hekk bidel is-sitwazzjoni bejnu u bejn il-midinbin illi rrikonċilja d-dinja miegħu nnifsu.
Alla wettaq dir-rikonċiljazzjoni għalina fi Kristu, hekk li apparti minn Ibnu li ġab is-sliem b’demmu, Alla ma jistax ikun għalina dak li hu. Bħala fidili ninsabu rikonċiljati m’Alla permezz tal-mewt ta’ Ibnu; fi kliem ieħor, bid-demm tas-salib. Ladarba aħna rikonċiljati allura wkoll ġustifikati: iż-żewġ ideat jakkumpanjaw lil xulxin.
Talba: “Missier, darba ma konniex poplu tiegħek; issa sirna niesek. Darba konna aljenati minnek; issa rikonċiljati permanentement. Darba fittxejna d-dlam u ma ridniex nersqu lejn id-dawl; issa volontarjament dorna lejk, magħmulin kapaċi bil-grazzja tiegħek. Iva, dan kollu nafuh għall-medjazzjoni ta’ Ibnek Ġesù. Agħtina li nservuh bla riżerva, għas-sebħ ta’ ismek qaddis. Ammen.”
Comments