“L-art tal-Mulej, u kulma fiha; id-dinja, u dawk li jgħammru fiha. Fuq l-ibħra għamel is-sisien tagħha, u fis-sod waqqafha fuq ix-xmajjar. Min jitla’ fuq l-għolja tal-Mulej? Jew min joqgħod fil-post imqaddes tiegħu? Min għandu jdejh indaf u qalbu safja; min ma jagħtix ruħu għall-frugħa, u lanqas jaħlef bil-qerq. Bniedem bħal dan ikollu l-barka tal-Mulej, u l-ħaqq minn Alla tas-salvazzjoni tiegħu” (Salmi 24:1-5).
Ir-rivelazzjoni speċjali tikkonvinċini dwar is-saltna universali, u s-saltna ta’ ġustizzja, sliem u ferħ fl-Ispirtu. Ladarba Alla Trinità ħalaq kollox skont ir-rieda tiegħu, mela d-dinja, dak kollu viżibbli u inviżibbli, huwa tiegħu! La oriġinatur, pussessur! Dal-pilastru tal-verità jeħtieġ jibqa’ bla mittiefes, altrimenti r-reliġjon tagħna tisfa materjalista. Il-Mulej huwa Kreatur, mhux għas-sebħ u l-unur ta’ xi razza partikolari, jew imqar għall-bnedmin, imma għalih innifsu, u sekondarjament għall-ġid u l-barka tagħna.
Distinzjonijiet u privileġġi pekuljari, nazzjonali jew personali, jimponu fuqna obbligi pekuljari.
Is-sovranità divina hi dottrina prezzjuża u profitabbli: tferraħ il-qalb devota, tumilja r-ruħ, tmantnina f’qima b’timenza. It-titlu proprjetarju t’Alla hu perfett u xieraq, peress li hu msejjes fuq il-kontroll kreattiv u providenzjali tiegħu. Konsegwentement id-dnub hu attentat biex iċaħħad ’l Alla mid-drittijiet tiegħu. Huwa frodi, serq, tostaġni u ribelljoni kontrih. Id-dnub ifixkilna milli nidhru quddiemu.
Filwaqt li m’hemm xejn fix-xjenza naturali li jikkonverti l-qalb, madankollu, meta l-qalb tkun imġedda mill-Ispirtu s-Santu, issib ħafna raġunijiet għala jmissha tadura ’l Alla fl-għemejjel kollha tiegħu tat-Tramuntana u n-Nofsinhar.
Dawk li jikkontemplaw l-opri t’Alla jqimuh. Sir Isaac Newton ma setax ikun infidil: ra ’l Alla fl-isplendur tas-smewwiet. L-istess Linnaeus: lemħu fix-xagħri bix-xewk, arbuxxelli u ħxejjex oħra.
Talba: “Agħtina widnejn jisimgħu u għajnejn jaraw, o Mulej. Nixtiequ illi nirreaġixxu dejjem kif jixraq għat-turija tiegħek innifsek, kemm fil-ħolqien kif ukoll fil-Kelma profetika. Id-divinità u l-omnipotenza tiegħek jidhru mifruxa fl-univers; l-imħabba u l-ħniena tiegħek esibejthom fl-inkarnazzjoni, il-mewt u l-irxoxt ta’ Ibnek, il-Garanti u r-Rappreżentant tagħna quddiemek. Grazzi, Missier!”
Comments