“Issa jien naf illi intom ilkoll, li fostkom għaddejt nipprietka s-saltna, mhux se taraw wiċċi iżjed. Allura naffermalkom fil-ġurnata tal-lum illi jien innoċenti minn demm kulħadd, għax m’eżitajtx milli niddikjaralkom il-fehma sħiħa t’Alla. Oqogħdu attenti għalikom infuskom u għall-merħla kollha, li fiha l-Ispirtu s-Santu qegħidkom sopristanti, biex tirgħu l-knisja t’Alla li akkwista b’demmu stess” (Atti 20:25-28).
Il-kwistjoni mhix kemm il-predikatur għandu lsien ħafif, elokwenti u x’naf jien. Fjuri u tlellix verbali, espressjonijiet mingħajr impressjonijiet fit-talb jew fl-ippritkar, mhuma xejn ħobż nutrittiv, iżda biss ċimblu jżarżar. Il-predikatur jeħtieġ ikun imqanqal mill-verità li biħsiebu jwassal; jekk japprowċja l-ministeru tiegħu klinikament, postu mhux bħala ħabbar tal-evanġelju. Impossibbli xxandar l-evanġelju, bxara inkredibbilment eċċellenti, u tibqa’ passiv. Ħadida taħraq, avolja mhix misnuna, tinfed iżjed il-kuxjenza minn ħadida kiesħa, avolja tkun misnuna aktar mill-oħra.
Il-qari privat tal-Bibbja kommendibbli, iżda qatt ma jista’ jieħu post l-ippritkar. Meta l-ħuġġieġa titqanqal tagħti aktar sħana milli meta tibqa’ bla mittiefsa; bl-istess mod bl-ippritkar u l-interpretazzjoni l-Iskrittura tħalli fjamma akbar fi qlub is-semmiegħa milli kieku jaqrawha waħidhom id-dar. B’sogħba nammetti li din mhix il-konvinzjoni popolari fost l-Evanġeliċi llum, li donnhom jiddisprezzaw id-doni li Kristu tahom, ċoè, predikaturi, rgħajja, għalliema u katekisti.
Henry Smith, bħal sħabu fil-ġenerazzjoni tiegħu, kellu stima għolja tat-tnedija pubblika tal-Kelma. Kollox kien jirrivolvi dwarha, konvinti illi fejn il-Kelma tiffjorixxi titwieled il-fidi, u fejn hemm il-fidi, jikber it-tagħrif ta’ Kristu u jgħaddi ’l quddiem. U fejn Kristu hu magħruf, hu maħbub u obdut.
Jgħid, “Salamun ikkunfessa illi studja biex ottiena d-dottrina tiegħu…Danjel kien profeta, u xorta waħda xtaq pawsa ta’ żmien qabel jinterpreta l-ħolma ta’ Nebukadnezzar…U jekk Ġesù riedna nikkonsidraw għalxiex nitolbu qabel nersqu lejn il-Missier, wisq aktar jeħtiġilna nqisu qabel niġu biex nippritkaw, għax hu aktar diffiċli xxandar il-Kelma t’Alla, milli titkellem m’Alla.”
Talba: “O Sid il-ħsad, ninterċiedu quddiemek għax-xandara tal-evanġelju. Għandhom sfida qawwija, iżda nemmnu li l-grazzja tiegħek tfornihom u tkun għalihom suffiċjenti. Agħtihom d-diskors fil-ftuħ ta’ fommhom ħalli jgħarrfu bil-kuraġġ il-misterju tal-evanġelju. Akkost illi jbatu, kif huma msejħin jagħmlu, nitolbuk biex ma jfittxux jingħoġbu mal-bnedmin iżda jaċċertaw ruħhom biss mill-approvazzjoni tiegħek. Iffortifikahom fl-ispirtu, u żommhom leali lejn il-mandat li rċevew mingħand Ibnek Ġesù. Ammen.”
Comments