“Għaliex intom b’ġenbejkom u bi spallejkom timbottaw u tagħtu bi qrunkom lill-morda kollha, sakemm waddabtuhom ’il barra. Għalhekk, jien insalva l-merħla tiegħi, u ma jkunux aktar priża; u nagħmel ħaqq bejn nagħġa u nagħġa. U nqiegħed fuqhom ragħaj wieħed, u jirgħahom, il-qaddej tiegħi David; jirgħahom hu stess, u jkun ir-ragħaj tagħhom” (Eżekjel 34:21-23).
Xi wħud huma godlija u mibrumin, u għalhekk jaħbtu jkunu insensittivi lejn id-debboli. Dan hu dnub li jġib miegħu ħafna mrar u għali. L-insensittività qatt m’hemm lok għaliha fost ulied Alla. Kull meta nimbottaw lil ħaddieħor fil-ġenb, jew nirrombaw lill-morda bil-qrun, inkunu qed noffendu qatigħ fil-ġemgħat tal-fidili.
Il-Mulej jinnota dawn l-għemejjel ta’ kburija u bla ħniena, u jirrabja kontrihom, għax iħobb id-dgħajfin. Ħalef illi jindokrahom, u jgħaddihom mid-dgħufija għall-qawwa. Jieħu ż-żmien, iżda l-għan tiegħu ma jfallix.
Jaqaw int wieħed minn dawk mistmella? Forsi m’ilekx wisq illi kkonvertejt, u għadek bilkemm tagħraf id-differenza bejn ix-xellugija u l-leminija? Int bniedem immarkat minħabba l-kuxjenza tenera tiegħek? Ħutek jiġġudikawk bl-aħrax? Tagħmilx f’qalbek minħabba l-kondotta tagħhom. Fuq kollox, timbottax bi tpattija. Ħalli l-kwistjoni kollha f’idejn il-Mulej: hu l-Imħallef. Għaliex għandna nixtiequ niddeffsu f’dan ix-xogħol tiegħu? Hu jiddeċiedi wisq iżjed ġustament minna. Il-ħin tal-ġudizzju tiegħu hu l-aħjar, u m’għandniex għalfejn ngħaġġluh.
Fl-istess ħin ħa jitriegħed dak li qed jgħakkes lill-oħrajn b’qalbu iebsa. Avolja għalissa jista’ jirfes fuq ħaddieħor bla kastig, ħa jkun jaf li d-diskors kburi tiegħu hu nnotat. Għal kull kelma żejda li jgħid jeħtieġ jagħti kont tagħha quddiem it-tribunal tal-Imħallef il-Kbir.
Talba: “Fik nista’ nistabar, Mulej, konfortatur tiegħi, għax int taf l-għali tiegħi, u ddawwarni bil-mogħdrija tiegħek. Ħaddieħor jista’ jwarrabni, iżda int tilqa’ lill-batut u l-minsi. Żommni b’rieda tajba lejn ħaddieħor, avolja ma jifhmunix u lanqas jissimpatizzaw bid-dgħufija tiegħi. Ammen.”
Comments