“Hu l-immaġni t’Alla l-inviżibbli, il-primoġenitu fuq il-ħolqien kollu. Għax bih inħolqu l-ħwejjeġ kollha, fis-smewwiet u fuq l-art, il-viżibbli u l-inviżibbli, sew jekk huma tronijiet jew dominji jew ħakkiema jew awtoritajiet – il-ħwejjeġ kollha nħolqu permezz tiegħu u għalih. Hu qabel il-ħwejjeġ kollha, u l-ħwejjeġ kollha fih iżommu flimkien. U hu r-ras tal-ġisem, il-knisja; hu l-bidu, il-primoġenitu mill-imwiet, sabiex hu nnifsu jkun jipprimeġġja f’kollox” (Kolossin 1:15-18).
Hemm tliet fatturi fil-providenza divina: it-tagħrif minn qabel t’Alla, l-iddeterminar tiegħu, u l-fatt li Alla jidderieġi sal-iċken ħaġa fl-avvenimenti tal-providenza u lejn tmiemha. F’ċertu sens il-providenza hi l-perpetwità u l-kontinwazzjoni tal-ħolqien.
Bi Kristu jżomm l-univers. Kull oġġett fin-natura għandu l-marka u s-siġill tiegħu. Kull ġurnata ttenni l-għeġubijiet tal-ħolqien. M’hemm ebda għodwa li fiha niftħu għajnejna illi matulha ma niltaqgħux ma’ xeni hekk impressjonanti u meraviljużi li laqgħu l-ħarsa affaxxinata ta’ Adam meta stebnaħ fl-eżistenza oriġinali tiegħu. Lanqas m’hemm oġġett, sew jekk hu ċagħqa jew perla, tfiefa jew kriżantemu, il-meded ta’ art fertili jew deżerti msaħħra, jew il-firmament interzjat bid-djamanti fuq rasna, ċentupied jew anġlu, qatra nida jew l-oċean potenti, tarbija tat-twelid jew eklissi solari, illi bih il-moħħ intelliġenti ma jirnexxilux jiddixxerni, u l-qalb devota tadura, il-providenza sapjenti u twajba tal-Iben li assuma n-natura tagħna biex jirriskatta r-ruħ imjassra tagħna. Jekk Alla mhuwiex fil-ħsibijiet tal-ħżiena, ċertament jinsab f’kull ħaġa oħra bla eċċezzjoni.
Semmejt il-kwiekeb. O s-sensazzjoni tinħoloq fija kull meta narahom jgħamżuli, donnhom iridu jgħadduli messaġġ! Naqra fihom il-kodiċi ta’ providenza li tippervadi kollox. Fis-smewwiet notturn nilmaħ l-id mimduda t’Alla, avolja inviżibbli, u l-kwiekeb leqqiena l-ġojjelli li ferrex għall-ammirazzjoni tagħna. Kif jista’ jkun ma narawx illi dirgħajh iħaddnuna minn kull naħa? Tabilħaqq, ma nistgħu nirtiraw imkien fejn l-imħabba universali ma tiddix.
Talba: “Alla omnipotenti, f’idejk jinsab in-nifs ta’ kull maħluq; int tieħu ħsieb il-bhejjem u l-bnedmin. Xejn mhu eskluż mill-ħakma providenzjali tiegħek. Għaldaqstant aħna nfaħħruk u nbirkuk, Sultan smewwieti, għax fik ngħixu, nitħarrku u neżistu; aħna nislek. X’sigurtà għandna fik! Ħa nkunu umli u grati quddiemek. Ammen.”
Comments