“Issa intom il-ġisem ta’ Kristu, u individwalment membri tiegħu. U Alla appunta fil-knisja l-ewwel nett appostli, it-tieni profeti, it-tielet għalliema, imbagħad dawk li jwettqu setgħat mirakolużi, imbagħad dawk b’doni ta’ fejqan, dawk kapaċi jgħinu ’l ħaddieħor, dawk b’doni t’amministrazzjoni, u dawk li jitkellmu b’xorti differenti t’ilsna. Jaqaw kollha appostli? Kollha profeti? Kollha għalliema? Kollha jaħdmu setgħat mirakolużi? Kollha għandhom doni ta’ fejqan? Kollha jitkellmu bl-ilsna? Kollha jinterpretaw? Imma xxenqu bil-ħerqa għad-doni ikbar. Kieku nitkellem bl-ilsna tal-bnedmin u tal-anġli, imma m’għandix imħabba, inkun biss gong storbjuż jew ċimblu jżarżar” (1 Korintin 12:27-13:1).
Nitfa ubbidjenza evanġelika preferibbli mill-kapaċità li tkun tagħmel il-mirakli. L-iżgħar grazzja hi sigurtà aħjar għall-Ġenna mill-ikbar doni jew privileġġi kwalunkwe. Id-doni jew għotjiet jistgħu jkunu biss grazzji ‘mejta’; iżda l-grazzji huma għotjiet ħajjin.
Bniedem donat hu bniedem kontabbli. Jista’ jkun indurat bit-talenti u abbiltajiet, frattant, jekk ma jkunx stabbilit bil-grazzja evanġelika fuq ġewwa, xorta waħda jista’ jispiċċa mormi fl-Infern, u jintilef għall-eternità. U jekk jiġri dan, xi traġedja! Għax aktar ma jkun kwalifikat bid-doni, aktar imbagħad jegħreq fl-abbissi. Jiġrilu l-istess bħal raġel imwaqqa’ fil-baħar: aktar ma jkun mgħobbi bl-injotti tad-deheb aktar jegħreq fil-pront. Hu u jegħreq, jekk isib iċ-ċans, jgħajjat l-ajjut u jgħid, “Eħilsuni minn dad-deheb, dat-toqol dehbi rrovinani!”
Id-doni mhuma ebda garanzija għall-Ġenna. Kristu hu l-passaport; dawk biss li jirkbu miegħu jaslu. Sikwit id-doni, mogħtija minn Alla bi skop tajjeb, għall-edifikazzjoni tal-aħwa u l-miljorament tal-proxxmu, jisfaw abbużati. Il-pussessur tagħhom isir jafda fihom flok ma jwaħħal ħarstu fuq Ġesù li qabel tah id-doni jridu jafda fih u fir-riparazzjoni mwettqa minnu fuq il-Golgota.
Id-doni spiss insibuhom jgħammru mad-dnub, għax meta jsiru eminenti, regolarment id-dnub narawh fl-axxendenza, jekk kemm-il darba Alla ma jiddomax il-kburija f’qalb il-bniedem, kif għamel ma’ Pawlu. Meta tellgħu fit-tielet sema, u tah soprabbondanza ta’ rivelazzjonijiet, fi ħnientu ħalla x-xitan iwaħħallu xewka f’ġismu. Hekk Pawlu baqa’ japprezza l-grazzja wisq wisq aktar mill-fatt li kien reċipjent ta’ rivelazzjoni divina.
Talba: “Agħtina d-dehen, Missier smewwieti, biex niskopru liema doni tajtna għall-edifikazzjoni tal-knisja tiegħek. Bihom nixtiequ nagħtu aktarx milli nirċievu. Għinna nħaddmuhom regolarment bl-imħabba u rieda tajba lejn ħutna, bla ma nippretendu prosit mingħand ħadd ħliefek. Tħalliniex nitgħażżnu jew inkunu bierda fis-servizz tagħna, f’ġieħ is-Salvatur tagħna Ġesù.”
Comments