“Min jagħlaq għajnu jġib l-għali, iżda iblah lablabi jiġġarraf. Fomm ir-raġel ġust hu għajn il-ħajja, iżda fomm il-ħżiena jistor il-vjolenza. Il-mibegħda tqajjem il-ġlied, iżda l-imħabba tgħatti l-ħtijiet kollha. Fuq xofftejn min għandu d-dehen jinsab l-għerf, iżda l-ħatar għad-dahar ta’ min ma għandux sens. L-għorrief jaħżnu l-għerf tagħhom, iżda fomm l-iblah hu ħsara fil-qrib” (Proverbji 10:10-14).
Id-diskors tajjeb, is-silenzju itjeb, bħalma d-deheb jisboq il-fidda fil-valur. Dan għaliex il-kliem jiġi bħaċ-ċirasa, naturalment, imma s-silenzju hu r-riżultat ta’ fehma u simpatija. Għalhekk, sikwit, meta l-boloh ireċplu, id-dehni jibqa’ b’fommu sieket. Aktar iva milli le, huwa l-fomm imsikket li jinstema’ l-aktar melodjuż.
Hawnhekk ma rridux immorru fl-estremità l-oħra: is-sempliċi silenzju mhuwiex ekwivalenti għall-għerf. Aktarx l-għerf jikkonsisti filli tkun taf x’tgħid, meta u kif, u liema huma s-sitwazzjonijiet fejn hu għaqli tirtira wara l-fortizza tas-silenzju.
Anke fil-ħajja privata tagħna, meta m’għandniex kuntatt ma’ ħaddieħor, nafu li t-tempju tal-ħsibijiet l-aktar safja huwa proprjament is-silenzju. Għax is-silenzju ġej mingħand Alla, u rikmandat minnu: “Iskot, u kun af li jien Alla!” “Il-Mulej jinsab fit-tempju tiegħu: ħa tiskot quddiemu l-art kollha!”
Tant aħna mferfxin illi m’għandniex ċans nilbtu ftit. X’avvanz inkunu għamilna meta nirċievu s-silenzju bħala l-mediċina ħelwa tal-qalb! Ħafna aktar nidmu għax tkellmu milli għax baqgħu siekta. Min jitkellem ikun qed jiżra’, imma min iżomm ilsienu bejn snienu jkun qed jaħsad. L-aħjar, però, hi l-linja medjana: skont Salamun, hemm ħin biex titkellem u ħin biex tiskot. Imma ieħor, ispirat bħalu u daqsu, jissuġġerixxi biex inkunu tqal biex nitkellmu u ħfief biex nisimgħu.
Talba: “Mgħallem ġust, int għidtilna illi mill-milja tal-qalb jitkellem il-fomm. Jisgħobbina talli minn ħalqna joħroġ il-gideb, it-tqasqis u d-diskors bla ħniena, aktar u aktar meta nafu illi dan juri l-istat fqir ta’ qalbna. Aħfer lill-qaddejja tiegħek; u oħloq fina qalb li tibża’ minnek u titriegħed għal Kelmtek. Ammen.”
Comments