“Nirringrazzja ’l Kristu Ġesù Sidna, li għamilni setgħan, għax ikkonsidrani fidil u appuntani f’das-servizz, avolja darba kont midgħi u persekutur u insolenti. Frattant sibt ħniena għax aġixxejt bl-injoranza u fl-inkredulità; il-grazzja ta’ Sidna tfawret fuqi, bil-fidi u l-imħabba li huma fi Kristu Ġesù. Affidabbli l-affermazzjoni u jistħoqqilha aċċettazzjoni sħiħa: Kristu Ġesù ġie fid-dinja biex isalva l-midinbin - li fosthom jien l-ewlieni. Iżda minħabba f’hekk sibt ħniena sabiex fija, l-agħar midneb, Ġesù Kristu jesibixxi l-paċenzja illimitabbli tiegħu bħala eżempju għal dawk li għandhom jemmnu fih għall-ħajja eterna.Issa lis-Sultan etern, immortali, inviżibbli, l-uniku Alla, ikunu unur u glorja għal dejjem ta’ dejjem. Ammen” (1 Timotju 1:12-17).
Alla tagħna hu l-Pantokrator, l-Omnipotenti, u allura hu t-torri setgħan tagħna, li fih ninħbew. Kemm tabilħaqq il-konfidenza tagħna fih tixhed il-fidi li nistqarruh bħala El Xaddaj? Ewwilla hi loġika niddependu fuqu għall-ġustifikazzjoni u l-glorifikazzjoni tagħna, iżda mhux għall-provdiment ta’ ħwejjeġ żgħar ta’ kuljum?
Kollox possibbli għal Alla. Naturalment b’kollox irridu nfissru kull ħaġa konsistenti man-natura tiegħu. Hi assurdità tgħid li Alla kapaċi jigdeb, imut jew jiċħad lilu nnifsu, ħwejjeġ li l-Iskrittura nfisha espliċitament issemmi bħala eżempji tal-limitazzjoni divina fl-omnipotenza tiegħu, limitazzjonijiet li huma proprjament il-glorja tiegħu. Għax għalkemm Alla kapaċi jagħmel linja dritta b’għasluġ mgħawweġ, ma jistax imur kontra n-natura tiegħu stess.
Inkwantu l-omnipreżenza tiegħu, mill-Medju Evu ssawret did-definizzjoni sublimi dwarha: iċ-ċentru t’Alla jinsab kullimkien, u ċ-ċirkonferenza tiegħu mkien. Fuq l-istess binarju, Alla l-ħaj ma jistax jissakkar f’xi post partikolari, għax is-sema hu t-tron tiegħu, u l-art mirfes riġlejh. Ebda maqdes ma jista’ jinbnielu biex jgħammar fih. Hu li firex is-smewwiet, is-smewwiet ma jistax jesgħu. Bl-istess mod, Alla ma jistax jitħalla barra minn xi post, mhux għax għandu bżonn post biex ikun kontenut fih, iżda għax fl-immensità tiegħu hu infinit. Il-moħħ spiritwali jarah f’kollox, imqar fi ħwejjeġ naturali, avolja l-moħħ karnali ma jarah f’xejn, lanqas fi ħwejjeġ spiritwali.
Xi ngħidu għal qdusitu? Alla hu mħabba, Alla hu nar li jikkonsma; iżda l-appellazzjoni l-aktar frekwenti mogħtija lilu fl-Iskrittura hi “l-Qaddis.” Żvela qdusitu lil Iżrael; u xtaqhom jikkonsidrawha bħala l-ġmiel tan-natura tiegħu. Jekk nikkummissjonaw ritratt ta’ raġel, nipprovaw nirrappreżentaw wiċċu, mhux idu jew dahru, u lanqas siequ. Nagħmlu tentattiv biex niddelinjaw ġmielu, biex niffriskaw imħuħna b’dak li hu l-aktar memorabbli u jiddistingwih fis-sura esterna tiegħu. Issa filwaqt li l-id jew is-swaba’ t’Alla jiddenotaw setgħetu u l-ħila tiegħu, u t-tron tiegħu hu s-simbolu tal-maestà u d-dominju tiegħu, hu nnifsu jikkonsidra qdusitu bħala l-appan veru tal-karattru tiegħu. Hekk iridna nkunu nafuh, bħala l-Missier Qaddis, kif sejjaħlu Ibnu speċifikament, jew b’mod aktar poetiku, Missieri jew Missierkom tas-smewwiet, ċoè, ta’ kwalità sublimi, ta’ purità u safa hekk li l-anġli mhumiex nodfa quddiemu, li għajnejh huma wisq safjin biex jaħmel l-inikwità.
Talba: “Aħna nittraċċaw nisilna minnek, o Alla Kreatur. Int sawwartna mit-trab tal-art u għamiltna fuq ix-xbieha tiegħek, biex nagħrfuk, inħobbok u nservuk, u wara dil-ħajja tintroduċina għall-glorja eterna, bil-merti tal-Ħaruf provdut minnek stess, il-Feddej li xtrana biex jifforma minna poplu pekuljari tiegħek, li jqimek u jservik fl-Ispirtu u fil-verità. Ħu ħsieb, Mulej, biex l-għan tajjeb tiegħek jintlaħaq fina.”
Comments