“Ġakobb missierhom qalilhom: ‘Għamiltuni bla wlied: Ġużeppi m’għadux iżjed, u Simgħon m’għadux iżjed, u tridu tiħduli ’l Benjamin: dan kollu kontra tiegħi.’ U Ruben kellem lil missieru, qallu: ‘Oqtol liż-żewġ uliedi, jekk ma nġibulikx; agħtihuli f’idejja, u jien nerġa’ nġibulek.’ U Ġakobb qal: ‘Ibni ma jinżilx magħkom, għax ħuh miet, u baqa’ waħdu. Jekk jiġrilu xi għawġ fit-triq li sejrin fiha, tniżżlu x-xagħar abjad tiegħi f’Xeol” (Ġenesi 42:36-38).
Ġakobb interpreta l-providenza divina u żbalja bl-ikrah. Ilmenta, “Kollox ġej kontrija,” mentri kollox attwalment kien favorih, għax Alla kien qed ihejji salvataġġ għalih u għal niesu.
Meta aħna jew qrabatna nimirdu jew insofru estremament ma jfissirx bilfors li Alla ‘nsiena.’ Oħt Lażżru qalet lil Ġesù, “Kieku kont hawn ħija ma kienx imut” (Ġwanni 11:21). Mur għidilha l-pjan kif kellu jiżvolġi! Anzi, nistgħu nkunu strumentali għall-wiri tal-glorja t’Alla.
Meta niltaqgħu ma’ oppożizzjoni aħna u nagħmlu r-rieda magħrufa t’Alla ma jfissirx li Alla m’għandux pjaċir bil-mogħdijiet tagħna. Ħafna missjonarji u ħaddiema oħra għal saltnet Alla jispiċċaw f’ħabsijiet, inġustizzji perpetrati kontrihom, u saħansitra martirju, bħalma sofrew Jim Elliott u sħabu fl-Ekwador.
Mill-banda l-oħra, meta kollox jiġina sonbor ma jfissirx bilfors li ngawdu t-tbissima t’Alla fuqna (Salmi 73:3f.,12f.).
Meta ma jkollokx suċċess viżibbli fil-ministeru tiegħek ma jfissirx bilfors li m’intix approvat minn Alla. Eżekjel, Isaija u profeti oħra qdew bl-ikbar fedeltà u frattant kienu mwissija mill-bidu li ma kinux se jkunu milqugħa.
Meta jkollok suċċess immedjat u kontinwat jista’ jkun li qed tgawdi l-barka t’Alla, kif kellu Ħaggaj meta inkuraġġixxa lill-poplu jerġa’ jaqbad jibni t-tempju. Imma jista’ jkun il-kuntrarju – ara x’suċċessun kellhom il-profeti foloz! Il-popolarità, in-numri u ċ-ċapċip tan-nies huma irrelevanti: “dak li hu valutat fl-għoli fost il-bnedmin huwa detestazzjoni f’għajnejn Alla” (Luqa 16:15). Dan narawh illustrat f’Elija fit-taqtigħa qalbiena tiegħu kontra r-reliġjon tal-istat u l-erba’ mija u ħamsin profeta falz.
X’se nikkonkludu mela? Fil-providenza hemm ħafna misterju, u sikwit hija impenetrabbli, għax il-mogħdijiet t’Alla mhumiex il-mogħdijiet tagħna. Jibqa’ l-fatt innegabbli: Alla qed irieġi kollox.
Talba: “Nadurawk u nberkuk, Mulej, għax is-saltna tiegħek fuq kollox taħkem. L-anġli jagħtuk qima, il-qaddisin fis-smewwiet jithennew fik, u l-ħolqien kollu jinseġ kontinwament ode ta’ tifħir lilek, l-oriġinatur tiegħu. Għallimna nużaw il-fakultajiet tagħna biex ningħaqdu magħhom f’innu universali lilek, o Alla Trinità.”
Comments