“Imma għalija ma jkun qatt li niftaħar ħlief bis-salib ta’ Sidna Ġesù Kristu, li permezz tiegħu d-dinja hi misluba għalija, u jien għad-dinja. Għax la ċ-ċirkonċiżjoni mhi xi ħaġa u lanqas l-inċirkonċiżjoni, iżda li jgħodd huwa ħolqien ġdid. Dawk kollha li jimxu ma’ dir-regola, is-sliem u l-ħniena fuqhom, iva, fuq l-Iżrael t’Alla” (Galatin 6:14-16).
Personalità integrata u bilanċjata hi ħaġa desiderabbli. Ħadd ma jista’ jikkritika kwalunkwe tentattiv biex ngħollu l-livell tal-għixien fis-soċjetà u ngħallmu lin-nies ikunu pjaċevoli u edukati. Kull mezz mediku, ekonomiku u politiku għandu jintuża biex nipproduċu dinja aħjar bl-ikbar ammont ta’ nies ċivili, ħielsa mill-faqar, l-isfruttament u l-inġustizzja. Il-gvernijiet messhom jimmiraw biex il-gid komuni tad-dinja jitqassam b’tali mod biex ebda individwu ma jsofri l-karestija u l-ġuħ.
Ħa ngħidu għas-saħħa tal-argument li wettaqna dan kollu. Ma jfissirx illi wasalna. Salvajniehom materjalment; spiritwalment għadhom fl-agħar predikament possibbli. Jekk pajjiżna jimtela b’ċittadini galbati, kuntenti bil-pulitizza u l-edukazzjoni tagħhom infushom, bla ma jixxenqu għal iktar, bla ma jfittxu lil Alla l-ħaj, xorta waħda jkunu għadhom fi bżonn urġenti ta’ salvazzjoni. Abbli nies bħal dawn, ċivilizzati, ikunu wisq iżjed diffiċli biex jitnissel fihom sens ta’ ħtija u kundanna quddiem it-tron divin.
Il-miljorament materjali mhuwiex fidwa. Il-fidwa wkoll timmiljora lill-bniedem, issa stess, u ttejbu wisq wisq iżjed milli qatt seta’ jimmaġina. Bid-don tas-salvazzjoni, Alla jaqleb kreaturi tiegħu f’uliedu. Mhux sempliċement jillapazza: qed jipproduċi speċi ġdida ta’ bnedmin. Mhux bħal meta tgħallem żiemel biex jaqbeż ix-xatba aħjar, iżda bħal meta tittrasforma żiemel fi ħlejqa mġewnħa. Naturalment, appik jitfaċċawlu l-ġwienaħ, jarma jogħla fuq ix-xtabi u anke bini. Imma jista’ jkun hemm perjodu meta l-ġwienaħ ikunu għadhom qed jispontaw. F’dak l-istadju ma jkunx kapaċi jtir. Jekk teżaminah dak il-ħin, bit-tumbati, jew ħotbiet, fuq spallejh, ħadd ma jkun jista’ jindovina illi għad ikunu ġwienaħ. Għall-kuntrarju, jidher pjuttost stramb fil-għajn.
Talba: “Missier, ma jixraqilniex illi nissetiljaw għal xi ħaġa inqas milli ddeterminajt int għalina. Tkun traġedja għalina nassumu illi jekk nedukaw ruħna allura wasalna. Int trid li t-tagħrif nutilizzawh għall-avvanz spiritwali tagħna, u kull ħaġa oħra għall-glorja tiegħek. Fakkarna fl-ideal tiegħek, biex ma naqgħux lura. F'ġieħ Ibnek Ġesù, ammen.”
Comments